Saddam Hýseınniń ushaǵy 35 jyl shólde turyp, endi satylymǵa shyǵaryldy
ASTANA. KAZINFORM – Irak bıligi Týnıs aýmaǵynda 35 jyldan beri turǵan eki Boeing 747 ushaǵyn 1,8 mıllıon dollarǵa satýǵa sheshim qabyldady. Olardyń biri kezinde Iraktyń burynǵy prezıdenti Saddam Hýseınge arnalǵan, dep habarlaıdy BILD.
1991 jyly Parsy shyǵanaǵyndaǵy soǵys kezinde joıylyp ketýden saqtaý úshin eki ushaq Iraktan Týnıske jetkizilgen. Alaıda sodan beri olar Baǵdadqa qaıtarylmaǵan.
Satylymǵa qoıylǵan ushaqtardyń biri – 1982 jyly shyǵarylǵan, tirkeý nómiri YI-ALM bolatyn Boeing 747SP. Aerotelegraph basylymynyń málimetinshe, áýe kemesi áýel bastan úkimettik ushaq retinde jabdyqtalǵan.
«Ál-Kadısııa» dep atalatyn ushaqtyń ishinde jeke demalys bólmeleri, konferents-zal jáne uıyqtaýǵa arnalǵan oryndyqtary bar salon ornalasqan.
1991 jyldyń qańtarynan beri ol Týnıstiń shóldi aımaǵyndaǵy Tozer-Nefta áýejaıynda tur. Halyqaralyq sanktsııalar, qarjylyq daýlar men turaq aqysynyń ósýi ushaqty Irakqa qaıtarýǵa kedergi bolǵan.
Iraqi Airways áýe kompanııasy Saddam Hýseınniń bul ushaqpen saparlaǵanyn resmı túrde rastaǵan joq. Degenmen ushaqtyń jabdyqtalýy men tarıhı fotosýretter onyń memleket basshysyna paıdalanýǵa berilgenin meńzeıdi.
1983 jyldyń qazanynda Saddam Hýseın qatysqan úkimetaralyq kelissózder kezinde ushaq Londonda bolǵan. Al 1986 jyly Máskeýge sapary barysynda Irak basshysy Boeing 747SP ushaǵynyń aldynda sýretke túsken.
Satylymǵa shyǵarylǵan ekinshi ushaq – tirkeý nómiri YI-AGP bolatyn Boeing 747-200. Ol 330 jolaýshyǵa arnalǵan jáne jolaýshy men júk tasymaldaýǵa paıdalanylǵan.
– Ushaqtar qazirgi kúıinde, eshqandaı kepildiksiz satylady. Olardy tasymaldaý, kedendik bajdar men salyqtardy tóleý satyp alýshynyń mindetine júkteledi. Saýdaǵa qatysýshylar ár ushaq úshin 180 myń dollar kepildik jarna engizýi tıis, – delingen satylym sharttarynda.
Áýe kompanııasy ushaqtardyń qaıta ushýǵa jaramdylyǵy týraly naqty málimet bermegen. Al Týnıs buqaralyq aqparat quraldary olardyń ushýǵa jaramsyz ekenin jazyp otyr.
Buǵan deıin de ushaqtardy satý áreketteri nátıjesiz aıaqtalǵan. 2023 jyly Irak ár ushaq úshin 494 myń dollar suraǵan.
Ushaqtardyń Tozer áýejaıynda uzaq jyldar turýy Irakqa qomaqty shyǵyn ákelgen. 2020 jyly el bıligi turaq aqysy boıynsha jınalǵan shamamen 5,4 mıllıon dollar qaryzdy ótegen.
Eger 2027 jyldyń qańtaryna deıin satyp alýshy tabylmasa, Iraqi Airways ushaqtardy metall synyǵyna ótkizý múmkindigin qarastyrýy yqtımal.
Saddam Hýseın 1979 jyldan bastap Irakty basqardy. 1990 jyly onyń Kýveıtke basyp kirý týraly sheshimi Parsy shyǵanaǵyndaǵy soǵysqa alyp keldi. 2003 jyly AQSh bastaǵan áskerı operatsııa nátıjesinde bılikten ketirildi. Sol jyldyń jeltoqsanynda Tıkrıt mańyndaǵy jerasty jasyryn ornynan tabyldy. 2006 jylǵy 30 jeltoqsanda Irak sotynyń úkimimen Baǵdadta ólim jazasyna kesildi.
Aıta keteıik, buǵan deıin Germanııanyń burynǵy kantsleri Angela Merkel paıdalanǵan úkimettik Airbus A340-300 ushaǵynyń bólshekterinen kádesyılar jasalyp, satylymǵa shyǵarylǵan edi.