Saddam Huseınniń ómiriniń sońǵy kúnderinde oqyǵan kitaby tanymal týyndyǵa aınaldy
ASTANA. 4 aqpan. QazAqparat - Saýdııalyq ǵalym Aıda ál-Karnıdiń «Muńaıma!» atty kitaby áıgili týyndyǵa aınalyp, álemniń 30 tiline aýdaryldy. Al taralymy - 10 mln.-ǵa jetken.
2011 jyly ómirlik mańyzy bar aqyl-keńesterden turatyn atalmysh kitap reseılik «Ýmma» baspasynda orys tilinde basylyp shyǵyp, oqyrmandardyń júregine jol tapqan bolatyn.
Muslim.kz saıtynyń jazýynsha, avtor óz eńbeginde adam balasyn tolǵandyratyn ózekti máselelerdi qozǵaǵan. «Kim baqytty bolýdy qalaıdy?», «Ýaıym-qaıǵydan qalaı qutylýǵa bolady?», «Ómirińdi jarqyn etýdiń joly qaısy?», «Kúızelisten qalaı arylýǵa bolady?», «Adamnyń óz-ózine degen senimin qalaı qalyptastyrýǵa bolady?», «Ómirge ózgelerdiń kózimen qalaı qaraýǵa bolady?». Karnı bul saýaldarǵa jaýap tabý úshin 300-ge jýyq derekkózdi paıdalanǵan eken.
Bul kitapqa Saýd Arabııasynyń hanzadasy Salman ıbn Ábdiáziz joǵary baǵa berip, úsh márte oqyp shyqqan kórinedi. Sondaı-aq, atalmysh týyndyny Saddam Huseın de ómiriniń sońǵy kúnderine deıin qolynan tastamaǵan.
