Saddam Hýseın «Ál-Kaıedamen» eshqashan yntymaqtaspaǵan - AQSh-ta jarııalanǵan qujattar
ASTANA. Qyrkúıektiń 23-i. QazAqparat - Saddam Hýseın «Ál-Kaıedamen» eshqashan yntymaqtaspaǵan jáne Ýsama ben Laden men onyń aınalasyndaǵylardy «opportýnıster jáne ekijúzdiler» dep sanaǵan.
Sársenbi kúni AQSh-ta jarııalanǵan qujattar osyny dáleldep otyr. Bul jerde FBR agentteriniń Hýseın úkimetiniń burynǵy vıtse-premeri Tarık Ázızden 2004 jyldyń qańtar-maýsym aılarynyń aralyǵynda alǵan jaýaptarynyń jazbalary týraly sóz bolyp otyr, dep habarlaıdy ITAR-TASS agenttigi.
Dıktatordyń ózi ólim jazasyna kesilerdiń aldynda bergen jaýaptarynda, «fanatık» dep sanaıtyn Ýsama ben Ladenmen eshqashan kezdespegenin jáne Irak úkimetiniń AQSh-qa qarsy kúreste «Ál-Kaıedamen» eshqashan yntymaqtaspaǵanyn moıyndaǵan bolatyn. Taǵynan taıdyrylǵan Hýseın sondaı-aq, Irakta jappaı qyryp-joıatyn qarý-jaraqtyń bar ekendigine sendirip, álemdik qoǵamdastyqty qasaqana aldaǵanyn aıtqan. Onyń aıtýynsha, ol shyndyqty aıta almaǵan, sebebi Iraktyń sol kezdegi basty jaýy sanalatyn kórshi Iran muny álsizdiktiń belgisi dep baǵalaýy múmkin edi.
