Sadaqty serik etken arý
AQTAÝ. KAZINFORM — Dástúrli sadaq atý – sport túri ǵana emes, ata-babadan mıras bolyp qalǵan asyl muranyń, ulttyq rýh pen tektiliktiń belgisi. Mańǵystaý óńirinde sońǵy jyldary bul baǵyt qarqyndy damyp, halyqaralyq jáne respýblıkalyq jarystarda jergilikti mergenderdiń esimi jıi atala bastady. Osy salanyń damýyna úles qosyp, jas býynǵa ulttyq sporttyń qyr-syryn úıretip júrgen jandardyń biri – Mańǵystaý oblystyq dástúrli sadaq atýdan jastar sanatynyń aǵa jattyqtyrýshysy Rıma Atabaeva.
Ushtaǵan aýylynyń týmasy Rıma Qaıyrǵalıqyzy negizgi mamandyǵy boıynsha muǵalim. Qazir Aqtaý qalasyndaǵy ІT mektep-lıtseıinde dene shynyqtyrý páninen sabaq beredi. Onyń dástúrli sadaq atýǵa degen qyzyǵýshylyǵy 2022 jyly Aqtaýda «AR» dástúrli sadaq atý ortalyǵy ashylǵan kezde bastalǵan.
– Dostarymmen birge ortalyqqa baryp, sadaq atýdy úırene bastadym. Negizi bul qyzyǵýshylyqtyń tamyry bala kúnnen bastaý alady. Aýylda júrgende symnan sadaq jasap, qoldan oq daıyndap oınaıtynbyz. Bala kezdegi sol áýestik keıin shynaıy sportqa ulasty, – deıdi ol.
Ýaqyt óte kele ol tek sportpen aınalysyp qana qoımaı, jattyqtyrýshy retinde qyzmetke de bet burdy. 2023 jyldan bastap dástúrli sadaq atýdy úıretip, birneshe sportshyny túrli jarystarǵa daıyndady. Keıin Mańǵystaý oblystyq ulttyq sport túrleri ortalyǵynda dástúrli sadaq atý bólimi ashylǵan soń, aǵa jattyqtyrýshy retinde jumysqa qabyldanǵan.
Rıma Atabaevanyń aıtýynsha, jattyqtyrýshy bolý úlken jaýapkershilikti talap etedi. Ásirese shákirt tárbıeleýde ustazdyń jeke úlgisi erekshe ról atqarady.
– Balaǵa qur sózden góri is arqyly áser etý mańyzdy. Sondyqtan shákirtterime tek sportty ǵana emes, tártipti, sabyrlylyqty, jaýapkershilikti de úıretýge tyrysamyn. Ustaz ben shákirt arasyndaǵy senim – jetistikke bastaıtyn basty faktorlardyń biri, – deıdi jattyqtyrýshy.
Ol sporttaǵy alǵashqy qadamdaryn da erekshe ásermen eske alady. Arnaıy jattyǵý alańy bolmaǵan kezeńde nysanany kóligine tıep alyp, qala syrtyna shyǵyp jattyǵatyn bolǵan.
– Alǵashqy jarystarda qatty tolqydym. Ásirese 50-60 metr qashyqtyqtan atqanda oǵym nysanaǵa tıe me dep qobaljydym. Alǵashqy Qazaqstan chempıonatynda tórtinshi oryn alyp qaldym. Sol kezde daıyndyqty odan ári kúsheıtý kerek ekenin túsindim, – deıdi ol.
Búginde óńirde dástúrli sadaq atý sportynyń deńgeıi aıtarlyqtaı ósken. Rıma Qaıyrǵalıqyzynyń aıtýynsha, Mańǵystaýda respýblıkalyq jarystardyń júldegerlerimen qatar, álem jáne Azııa chempıondary da tárbıelenip shyqqan. Jattyqtyrýshy ózi de sporttyq sheberligin shyńdaýdy toqtatpaǵan.
2025 jyly Túrkııanyń Ystanbul qalasynda ótken halyqaralyq ashyq týrnırge qatysyp, tájirıbe jınaqtaǵan. Al jýyrda ótken qalalyq «Mańǵaz mergen» ashyq lıgasynda bas júldeni ıelenip, mergendik sheberligin taǵy bir márte dáleldedi.
– Bul jeńis men úshin erekshe mańyzdy. Birinshiden, shákirtterimniń aldynda ustaz retinde abyroıymdy arttyrdy. Ekinshiden, balalaryn maǵan senip tapsyrǵan ata-analardyń úmitin aqtaǵandaı boldym. Jarysqa asa kóp daıyndaldym dep aıta almaımyn. Biraq jınaǵan tájirıbe, durys tehnıka jáne ishki tynyshtyq jaqsy nátıje kórsetýge kómektesti, – deıdi ol.
Onyń aıtýynsha, búginde áıelderdiń sadaqshylyqpen aınalysýyna qoǵam tarapynan oń kózqaras qalyptasqan. Qaıta ulttyq sportqa qyzyǵatyn qyz-kelinshekterdiń qatary artyp keledi. Munyń ózi dástúrli sadaq atýdyń keńinen nasıhattalyp, kópshilik arasynda tanymal bola bastaǵanyn kórsetedi.
Ulttyq sportty serik etken Rıma Atabaeva úshin sadaq atý – jaı ǵana jarys nemese hobbı emes. Bul – ata-baba amanatyna adaldyq tanytyp, ulttyq qundylyqtardy keler urpaqqa jetkizýdiń bir joly.
Buǵan deıin jýsannan hosh ıistendirgish dıffýzorlar daıyndaıtyn Mańǵystaýlyq pedogog týraly jazǵan bolatynbyz.
