Sadaqany onlaın túrde berýge bolady

ASTANA. QazAqparat - Qazaqstanda sadaqa berýge arnalǵan mobıldi qosymsha iske qosyldy, dep habarlaıdy QazAqparat.

QMDB baspasóz qyzmetiniń habarlaýynsha, «Qazaqstan musylmandary dinı basqarmasy janyndaǵy «Zeket» korporatıvtik qaıyrymdylyq qory sadaqa, zeket berý júıesin ońtaılandyrý maqsatynda qordyń mobıldi qosymshasyn iske qosty.

Qosymshada «zeketti esepteý», «zeket kitaby», «qor týraly», «bizdiń is-sharalar», «onlaın sadaqa jasaý», «muqtaj jandar bazasy» syndy basty mázirler arqyly qajetti keńester, aqparattar men málimetter alýǵa bolady.

«Mobıldi qosymshany iske qosýdaǵy negizgi maqsatymyz - qaıyrymdylyq kómek kórsetýge, zeket berýge nıet bildirgen azamattarǵa qolaıly múmkindik jasaý. Qosymshaǵa kómekke asa zárý jandardyń ortaq bazasyn engizdik. Onda naýqastyń aty-jóni, turǵylyqty meken-jaıy, medıtsınalyq anyqtamalar jáne taǵy basqa qajetti qujattar júktelgen. «Onlaın sadaqa jasaý» máziri arqyly atalǵan kisige kómek bere alasyz. Qordyń basty ustanymy - elimizde sharıǵat boıynsha sadaqa-zeket berý dástúrin qalyptastyrý, qarjylyq móldirlikti, bárine birdeı aqshalaı ashyqtyqty qamtamasyz etý», - deıdi «Zeket» qorynyń dırektory Talǵat Omarov.

Onyń aıtýynsha, mobıldi qosymshanyń bir ereksheligi, avtomatty eseptegish (kalkýlıator) quraly zeket berý kórsetkishine jetken mal-múliktiń, ıaǵnı jınaqtalǵan qarjynyń zeketin birden anyqtaıdy. Mobıldi qosymshany «Play Mapket» júıesi arqyly «QMDB zeket» sózin jazyp, júktep alýǵa bolady.