Sadaqa berýdiń jańa jobasyn engizýde QMDB-ny asyqtyrýdyń qajeti joq - Din isteri agenttigi
ASTANA. QazAqparat - Sadaqa júıesi birneshe oblys ortalyqtarynda joba retinde engiziledi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Din isteri agenttiginiń tóraǵasy Marat Ázilhanov aıtty.
Sadaqa berýdiń elektrondy júıesi máselesine toqtalǵan agenttik basshysy, «qazirgi kezde sadaqa júıesi ázirge iske qosylǵan joq. Byltyr biz osy júıeni jasap, Dinı basqarmaǵa usynǵanbyz. Qazirgi tańda bul óte kúrdeli másele, óıtkeni buny birden engize salý jeńil emes. Sondyqtan da búginde Dinı basqarma osy jobany zerttep jatyr. Bizdiń bilýimizshe, olar birneshe oblys ortalyqtarynda joba retinde birneshe kezeńmen engizýge nıetti», - dep naqtylady M. Ázilhanov.
Sonymen qatar agenttik basshysy bul joba qarjymen qatar uıymdastyrýshylyq jumystardy qajet etetinin atap ótti. «Sondyqtan da olardy (QMDB) asyqtyrýdyń qajet joq», - dep túıdi M. Ázilhanov.
Esterińizge sala keteıik, byltyr Qazaqstanda sadaqa berýdiń elektrondy júıesi qurylatyny habarlanǵan bolatyn. Bul sharalar Qazaqstandaǵy dinı birlestikterdiń qarjylyq jaǵdaıynyń ashyqtyǵyna negizdelgen bolatyn. Atap aıtqanda, syrttan keletin jat aǵymdardyń eldegi dinı mekemelerge qarjylyq qoldaý kórsetýine jáne dinı mekemeler qarajatynyń basqa maqsattarǵa jumsalýyna tosqaýyl qoıý maqsatynda qolǵa alynǵan edi. Osy rette basty sharalardyń biri sadaqa berýdiń elektrondy júıesin engizýge baılanysty bolyp otyr. Bul joba aıasynda meshitterge termınal sekildi qurylǵylar qoıylady dep josparlanǵan.
