Sábizdiń jappaı búlinýi derekteri anyqtalmady - AShM

ASTANA. KAZINFORM – Qazaqstan óńirlerin tolyqtaı sábizben qamtamasyz etý múmkindigi bar. Bul týraly QR Aýyl sharýashylyǵy vıtse-mınıstri Ermek Kenjehanuly málim etti.

Búgin Senattyń jalpy otyrysynan keıin tilshiler áleýmettik jelide kóterilip jatqan sábiz máselesine qatysty suraq qoıdy.

Óz kezeginde vıtse-mınıstr sábiz boıynsha oblys ákimdikteri mınıstrlikke tıisti aqparatty joldaǵanyn aıtty.

- Qazir sábizdiń jappaı búlinýi derekteri anyqtalǵan joq. Biren-saran jaǵdaı oryn alýy múmkin, biraq barlyq qoımalarda osyndaı faktiler joq. Atap aıtqanda, Qazaqstanda óz aýmaǵyn tolyqtaı sábizben qamtamasyz etý múmkindigi bar. Byltyr shyqqan ónim qazir halyqtyń suranysyna jetkilikti, - dedi E. Kenjehanuly.

Onyń sózine qaraǵanda, qazirgi kezde baǵanyń ósýine negiz joq.

- Áleýmettik jelilerde «sábizge tıisti sertıfıkattar berilmeı jatyr, sonyń saldarynan ónim búlinedi» degen ýáj aıtylyp otyr. Ony biz rastamaımyz, óıtkeni qazir fıtosanıtarlyq sertıfıkattar turaqty túrde berilip otyr. Oǵan eshqandaı tosqaýyl men shekteý joq. Tıisti kásiporyndar óz ónimin eksporttap jatyr, sondaı-aq bizdiń ishki naryqta da sábizge suranys óte joǵary, - dedi vıtse-mınıstr.

Jaqynda pavlodarlyq fermerler qoımadaǵy tonnalaǵan sábizdi sata almaı otyrǵany habarlanǵan edi.