Sábiz kólemi ishki naryqty qamtamasyz etýge jetkilikti – Serik Jumanǵarın
ASTANA. KAZINFORM – Sábiz eksportyna tyıym salý máselesine qatysty depýtattyq saýalǵa jaýap bergen QR Premer-Mınıstriniń orynbasary – Ulttyq ekonomıka mııstri Serik Jumanǵarın Úkimettiń bul baǵytta júıeli jumys júrgizip jatqanyn aıtty.
– Úkimet ishki naryqty azyq-túlikpen qamtamasyz etý jáne baǵa turaqtylyǵyn saqtaý maqsatynda aýyl sharýashylyǵy taýar óndirýshilerin jan-jaqty qoldaýǵa baǵyttalǵan júıeli sharalardy iske asyryp keledi, – dedi mınıstr.
Onyń aıtýynsha, qazirgi ýaqytta fermerlerge mıneraldy tyńaıtqyshtar, tuqymdar, pestıtsıdter men aýyl sharýashylyǵy tehnıkasyn satyp alýǵa sýbsıdııalar berilip jatyr. Sonymen qatar jeńildetilgen janar-jaǵarmaı, qoljetimdi qarjylandyrý, sýarý sýyn jetkizý shyǵyndaryn óteý jáne sýarý júıelerin keńeıtý sharalary qarastyrylǵan.
– Memlekettik qoldaý sharalary eń aldymen ishki naryqty otandyq ónimmen tolyqtyrýǵa, qazaqstandyq óndirýshilerdiń eksporttyq áleýetin arttyrýǵa jáne salany damytýǵa baǵyttalǵan, – dep atap ótti Serik Jumanǵarın.
Mınıstrdiń málimetinshe, 2025 jyldyń qorytyndysy boıynsha elimizde kókónisterdiń jalpy jınalymy 3,8 mln tonna bolǵan, onyń ishinde sábiz – 411,9 myń tonna.
– Atalǵan kólem ishki naryqty tolyq qamtamasyz etýge, sondaı-aq ónimniń belgili bir bóligin eksportqa shyǵarýǵa jetkilikti, – dedi ol.
Maýsymaralyq kezeńde baǵany turaqtandyrý maqsatynda barlyq óńirde kókónis ónimderin aldyn ala kelisimshart arqyly satyp alý jumystary aıaqtalǵan.
– Qazirgi tańda respýblıka boıynsha, aýyl sharýashylyǵy taýar óndirýshilerinde, turaqtandyrý qorlarynda jáne saýda uıymdarynda 170,3 myń tonna kóleminde sábiz qory qalyptastyryldy. Bul kólem 2026 jylǵy erte ónim jınalǵanǵa deıin ishki naryqty qamtamasyz etýge jetkilikti, – dedi mınıstr.
Osyǵan baılanysty Úkimet sábiz eksportyna shekteý engizýdi josparlap otyrǵan joq.
– Іshki naryq jetkilikti deńgeıde qamtamasyz etilgendikten, qazirgi ýaqytta sábiz eksportyna shekteý engizý týraly sheshim qabyldanǵan joq. Óndirýshiler ónimderin syrtqy naryqtarǵa kedergisiz shyǵara alady, – dedi Serik Jumanǵarın.
Onyń sózinshe, ishki naryqty otandyq ónimmen qamtamasyz etý jáne baǵa turaqtylyǵyn saqtaý máseleleri Úkimettiń turaqty baqylaýynda.
Aıta keteıik, Ertis boıynyń fermerleri sábiz eksportyna shekteý engizbeýdi suraǵan edi.
