Sábiz baǵasy qymbattap, qııar arzandady

ASTANA. KAZINFORM – Ulttyq statıstıka bıýrosy elimiz boıynsha naýryz aıyndaǵy jáne bir jyldaǵy ınflıatsııa týraly málimetterdi jarııalady.

2024 jylǵy naýryzda tutyný baǵalarynyń aılyq ındeksi baıaýlap, 0,7% qurady (osy jylǵy aqpanda – 1,1%). Aqyly qyzmetter baǵasy 1,1%, azyq-túlik taýarlary 0,6%, azyq-túlik emes taýarlar 0,5% ósken.

Turǵyn úı-kommýnaldyq sharýashylyq salasynda sý burý tarıfi 6,1%, elektr energııasyna – 5,9%, sýyq sýǵa – 4,4%, ortalyqtan jylytýǵa – 2,4%, ystyq sýǵa 2,3% ósti. Qonaq úı qyzmetteri – 1,7%, qoǵamdyq tamaqtandyrý qyzmetteri – 1,2%, shashtaraz qyzmeti 0,8% qymbattaǵan.

Azyq-túlik taýarlary sanatynda kókónister men jemisterdiń baǵasy naýryzda edáýir óskeni baıqalady. Onyń ishinde alma 4,7%, júzim, sábiz 2,7%-dan, aq qaýdandy qyryqqabat 1,4% qymbattaǵan. Baǵanyń ósýi qumshekerge 3,2%, jumyrtqaǵa – 1,5%, qyshqyl sút ónimderine 1,3%, sútke, nanǵa 0,9%-dan tirkeldi. Bul rette qııar 7,1%, kúnbaǵys maıy 5,7%, basty pııaz 5%, qaraqumyq jarmasy 3% arzandady.

Óńirler arasynda eń joǵary aılyq ınflıatsııa Pavlodar oblysynda (2,1%), al eń tómengi ınflıatsııa Túrkistan oblysynda (0,2%) tirkeldi.

Óńirler bólinisinde eń joǵary azyq-túlik taýarlarynyń baǵalary Jetisý oblysynda 1,1%, azyq-túlik emes taýarlar Shymkent qalasynda 1,2%, aqyly qyzmetter Pavlodar oblysynda 5,8% ósken.