Sabyrjan Keńshilik: Volonterlik - qazaqtyń izgi qasıetterimen sabaqtas
«Memleket basshysy Qasym-Jomart Toqaevtyń qatysýymen ótken respýblıkalyq volonterler front-ofısiniń ashylýynda maǵan Qyzylorda qalasynda qolǵa alynǵan «Jeńis» jobasy jóninde keńinen aıtyp berýge múmkindik týdy. Atynan kórinip turǵanyndaı, bul joba maıdangerler men tyl ardagerlerine arnalǵan. Joba boıynsha qart kisilerge dári-dármek, ózge de qajettiliktermen qamtamasyz etýge mán beriledi. Qazirgi tańda bul baǵytta naqty jumystar atqaryp kelemiz. Ardagerlerge kómek kórsetip, olardyń muń-muqtajyna kóńil bólemiz. Aıta keterligi, joba óziniń tıimdiligin dáleldeı tústi. Sondyqtan aldaǵy ýaqytta bul baǵytta júıeli jumystar jalǵasa beredi», - dedi S. Keńshilik.
Respýblıkalyq volonterler front-ofısiniń ashylýynda tikeleı efırde elimizdiń eki aımaǵymen baılanys ornatyldy. Telekópir arqyly Almaty jáne Qyzylorda qalalarynda volonterler jumysy jóninde baıandaldy. Memleket basshysyna Qyzylorda oblysyndaǵy «Eko saqshylary» jobasy jóninde maǵlumat berildi.
«Respýblıkalyq shara barysynda QR Prezıdenti elimizdegi volonterler úlesin arttyrý qajettiligine toqtaldy. Sondaı-aq, burynnan aıtylyp júrgen volonterlikti eńbek ótiline qosý jónindegi usynys qoldaý tapty. Óıtkeni, osy baǵytta birshama problema týyndap jatatyn. Árbir jas qyzmetke ornalasý aldynda eńbek ótili máselesine kezigetin. Volonterlik qyzmetti eńbek ótili retinde sanaý qıyndyqty jeńildetedi. Bul turǵyda tıisti zańdarǵa ózgerister engizý máselesi qolǵa alynatyn boldy. Búgingi kúnderi qalalyq jastar resýrstyq ortalyǵynyń bastamasymen oblys ortalyǵynda birqatar is-sharalardy júzege asyrý josparda bar. Bizde eriktiler korpýsy ashyldy. Onda eriktilerdi arnaıy oqytýǵa nazar aýdarylady. Qazir mektepter janynan eriktiler klýby ashyldy.
Birikken Ulttar Uıymy bekitken volonterlik qyzmettiń 14 túri bar. Bizde áleýmettik jáne ekologııalyq baǵyttaǵy eriktiler qyzmetine ǵana mán beriledi. Endigi kezekte osy maqsatta nasıhat sharalaryn qolǵa aldyq. Solardyń biri retinde ekologııalyq eriktilerdi aıtýǵa bolady. Bul baǵytta medıtsınaǵa qyzyǵýshylyǵy bar stýdentter men oqýshylar volonter bola alady. Ózge de baǵyttar boıynsha jumys jasaýǵa kóńil bólinedi», - dedi ortalyq basshysy.
Onyń aıtýynsha, aldaǵy josparda jastardy volonterlik turǵyda oqytý máselesine nazar aýdarylady. Ol jumystar óz deńgeıinde júzege asyrý - negizgi mindettiń biri.
«Qazaq halqynda jabyrqaǵannyń janynan tabylyp, olarǵa qoldaý kórsetý - burynnan bar qasıet. Qarapaıym tirshiligine kóz salsaq, asar jasaý, qınalǵan adamǵa qol ushyn berý sekildi qasıetter áli kúnge deıin jalǵasyn taýyp otyr. Eriktiler isi sol jaqsylyqtyń jalǵasy ispettes. Ol jastardyń boıynda otansúıgishtik, patrıottyq, eljandylyq, janashyrlyq sezimderdi oıatady», - dedi S.Keńshilik.