«Sabyrsyz» jýrnalıstiń áreketi jelide qyzý talqylandy
BEIJІŃ. QazAqparat - Búkilqytaılyq halyq ókilderiniń 13-shi shaqyrylymynyń tarıhı 1-shi sessııasynda jýrnalıst boıjetkenniń kúlkili qımyly vıdeoǵa túsip qaldy. Atalǵan beınejazba áleýmettik jelide qyzý talqylandy, dep habarlaıdy «QazAqparat» HAA menshikti tilshisi.
Oqıǵa 13 naýryz kúni Halyqtyq jıyndar úıinde bolǵan. «Birinshi Tsaıtszın» Shanhaı basylymynyń jýrnalısti Lıan Sıanı tikeleı efırde AMTV telearnasynan kelgen áriptesiniń sózin «erekshe» tyńdaǵan. Lıan Sıanı áriptesiniń uzyn-sonar sóılemge aınalyp ketken suraǵyn sabyrsyz, kózin aqshıta tyńdap turǵanyn vıdeodan baıqaýǵa bolady.
Suraqtyń 40-shy sekýndynda boıjetken mıkrofon ustap, qyzyl kostıým kıip turǵan tilshige qas-kózimen bir baǵa berip, kózin alaıta burylyp ketedi. Eń qyzyǵy, jıyn aıaqtalǵannan keıin eki tilshi Qytaıda zor tanymaldyqqa ıe bolǵan. Áleýmettik jelilerde olardy kúlki etken kóptegen ázilder tarap, tipti «Taobao» elektrondy saýda alańynda atalǵan jaǵdaıdyń sýretteri smartfondarǵa arnalǵan qaptamaǵa aınalyp shyǵa kelipti.
«QazAqparat» HAA tilshisimen tildesken qytaı jýrnalısteri Lıan Sıanıdi qoldaıtyndaryn aıtqan. Olardyń paıymdaýynsha, az ýaqytta uzyn-sonar suraq qoıǵan Chjan Hýeıtszıýnnyń áreketine Lıan Sıanı barlyq tilshilerdiń kózqarasyn bildirgen.
«Kásibı tilshilerdiń suraqtary qysqa da nusqa bolýy kerek. Mundaı sharalar ózin-ózi kórsetýdiń amaly emes», - dep pikirin bildirdi tilshilerdiń biri.
Osy áreketi úshin «sabyrsyz» jýrnalıst atalǵan jıynnyń budan keıingi sharalaryna qatysý akkredıtatsııasynan aıyrylǵan.
