«Sabyr túbi - sary altyn» máteliniń aıasynda ómir súretin kezeńi keldi - Jamaleden Ibragımov

NUR-SULTAN. QazAqparat - Elimizdegi qazirgi jaǵdaıǵa ár azamat beı-jaı qaramaýy tıis. Bul týraly L.Gýmılev atyndaǵy Eýrazııa ulttyq ýnıversıteti zań fakýltetiniń dekany Jamaleden Ibragımov aıtty, dep habarlaıdy QazAqparat tilshisi.

«Memleket basshysy Qasym-Jomart Toqaev qazaqstandyqtarǵa úndeý jasaý arqyly eldegi jaǵdaıdy tolyq taldap, baıandap berdi. Memleket tarapynan atqarylyp jatqan is-sharalardy aıqyndap, atqarýshy bılikke taǵy da naqty mindetter júktegenin aıtty. Árıne búgingi tańdaǵy jaǵdaıǵa ár azamat beı-jaı qaramaýy tıis. Naǵyz jaýapkershilikti túsinip, quqyqtyq memlekette ómir súrip jatqandyǵymyzdy umytpaýymyz qajet. Jalǵan aqparat taratyp, dári-dármekti zańsyz satýǵa jol bergender zańnyń aıasynda jaýapqa tartylýy tıis», - dedi ol.

Zańgerdiń atap ótýinshe, Densaýlyq saqtaý mınıstrligi, medıtsına salasynyń qyzmetkerleri tyń baǵytta jan-jaqty ári júıeli jumys atqarýǵa daıyn bolýǵa mindetti.

«Sabyr túbi - sary altyn» máteliniń naqty aıasynda ómir súretin kezeńi keldi. Árbir qazaqstandyq qıyndyqtardy túsine bilip, shydamdylyq tanytyp, memleket tarapynan istelip jatqan sharalarǵa úles qosýy tıis. Memleket basshysynyń eldiń qamyn oılap, jumylyp iske kirisýge shaqyrǵan bul úndeýi der kezindegi ári qajetti málimdeme deýimizge bolady«, - dedi Jamaleden Ibragımov.

Aıta keteıik, keshe QR Prezıdenti Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeý jasap, onda 13 shilde kúni Ulttyq aza tutý kúni dep jarııalanatyndyǵyn aıtqan edi.