Sabyrjan Aqqalyqov Azııa chempıonaty fınalyna ótti

ASTANA. KAZINFORM — Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatynda búgin, 7 sáýirde jartylaı fınalda el quramasynan Sabyrjan Aqqalyqov (75 keli) jekpe-jek ótkizdi.

Otandasymyz jartylaı fınalda mońǵolııalyq Dalaı Ganzorıgpen sharshy alańǵa shyqty.
Alǵashqy raýndtan otandasymyz basymdyqty qolǵa alyp, 1-raýndta qarsylasyn 2 márte nokdaýnǵa túsirdi. 2-raýndta Sabyrjannyń aıqyn basymdyǵyn kórgen tóreshi jekpe-jekti toqtatty.

Aıta ketsek, budan buryn Aıgerim Sáttibaeva (48 keli) Nomýndarı Enh-Amgalanǵa ese jiberip, qola júldeger atandy.

Endi el quramasynan kúndizgi sessııada 7-jupta Nurbek Oralbaı (85 keli) taǵy bir mońǵolııalyq Barıahaan Dorjben qolǵap túıistirse, 9-jupta Aıbek Oralbaı (90 keliden joǵary) túrkimenstandyq Dovlet Islamovpen sharshy alańǵa shyǵady.

Qazaqstandyq eki boksshy 14:00–de bastalatyn keshki sessııada synǵa túsedi. Aldymen 3-jupta Orazbek Asylqulov (60 keli) ózbekstandyq Ábdirahmon Mahmýdjonov, 8-jupta Saǵyndyq Toǵambaı (90 keli) ózbekstandyq Halımjon Mamasolıevpen kezdesedi.