«Sábıra Maıqanova» dep atalatyn jańa kitap jaryq kórdi
ALMATY. Naýryzdyń 24-i. QazAqparat /Erlik Erjanuly/ - Keshe Almatydaǵy Qazaqtyń Muhtar Áýezov atyndaǵy akademııalyq drama teatrynda «Teatr kóktemi» festıvali aıasynda «Sábıra Maıqanova» dep atalatyn jańa kitaptyń tusaýkeseri ótti, dep habarlaıdy QazAqparat.
Kitapty qurastyrǵan belgili teatr synshysy, professor Áshirbek Syǵaı. Ol «Ǵıbratty ǵumyr» serııasy boıynsha «Qazaqstan» baspasynan jaryq kórip otyr. Kitaptyń 1-shi bóliminde "Ótken shaq elesteri" degen atpen áıgili óner sańlaǵynyń óz qolymen jazyp qaldyrǵan jazbalary berilgen. «Darıǵa dáýren» dep atalatyn ekinshi bólimde Sábıra Maıqanova týraly estelikter toptastyrylǵan. «Kemseńdep qalǵan eliń bar» dep atalatyn 3-shi bólimde KSRO jáne QazKSR halyq artısi, Memlekettik syılyqtyń ıegeri dúnıeden ozǵan kezde aýyr qazaǵa qabyrǵasy qaıysqan zamandastary men áriptesteriniń estelikteri jınaqtalǵan.
«Ol kisi obrazdy syrlamaıtyn, boıamaıtyn. Kesteleıtin, keste tigetin sahnada. Sábıra Maıqanova ótken zamannyń tulǵasy emes. Ol qazir bizben birge júr. Biz onyń eńbekterin zertteýimiz kerek. Bul jas akterlerdiń ústeliniń ústinde turatyn kitap», deıdi Sábıra Maıqanqyzynyń amanaty boıynsha jazbalaryna ádebı óńdeý jasaǵan Áshirbek Syǵaı.
