«Sabyr» fılmi Cineshort halyqaralyq platformasynda kósh bastady

ASTANA. KAZINFORM – QR Mádenıet jáne aqparat mınıstrliginiń jáne Ulttyq kınony qoldaý memlekettik ortalyǵynyń qoldaýymen túsirilgen «Sabyr» qysqametrajdy fılmi halyqaralyq aýdıtorııanyń qoldaýyna ıe boldy.

Mınıstrlik málimetinshe, týyndy Sineshort qysqametrajdy fılmderiniń álemdik platformasynda reıtıng kóshbasshylarynyń qataryna endi.

Fılmde oqyp, jaza almaıtyn ekinshi synyp oqýshysy Sabyrjannyń oqıǵasy baıandalady. Anasy men muǵalimderi ony túsine almaıdy. Balada dısleksııa derti bar ekenin bilmeı, jıi sógedi. Al bul – úlkender tarapynan túsinistikti qajet etetin erekshelik.

Fılm mańyzdy áleýmettik taqyrypty kóteredi jáne kórermenge mekteptegi balalardyń qıyndyqtaryna muqııat qaraý qajettigin jetkizedi. Fılmniń rejısserleri –Marına Zıbert pen Damır Tanatov.

Joba ulttyq jáne halyqaralyq deńgeıde joǵary baǵalandy. «Sabyr» VIII halyqaralyq BAIQONYR kınofestıvaliniń ulttyq baıqaýynda «Úzdik fılm» júldesiniń ıegeri atandy, al basty róldi oınaǵan jas akter Salıh Beısenbaı rólin úzdik somdaǵany úshin marapattaldy.

Sonymen qatar fılm UMUT halyqaralyq kınoforýmynda «Úzdik rejısser» syılyǵyn jeńip aldy. Fılm Torontodaǵy Peaks Central Asian Film Festival aıasynda Soltústik Amerıka premerasynda usynyldy.

Aıta keteıik, Cineshort – bul dártúrli janrdaǵy avtorlyq jáne festıvalge arnalǵan fılmderdi usynatyn Halyqaralyq qysqametrajdy fılmder platformasy.

«Sabyr» kartınasy 9,3 ball jınap, kórermen qyzyǵýshylyǵyn týdyrdy.

Aıta keteıik, «Qajymuqan» fılmi Italııadaǵy festıvalda birneshe júlde aldy.