Sábıin kótergen kýrer-anaǵa qandaı qoldaý kórsetildi
ASTANA. KAZINFORM — Shaqalaǵyn kóterip, Almatyny kezip, kýrer bolyp júrgen áıel Shymkentke kóship ketti. Bul jóninde Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev málimdedi.
— Bul aqparat jarııa bola sala, Almaty qalasynyń jumyspen qamtý jáne áleýmettik baǵdarlamalar basqarmasy memleket atynan onyń úıine bardy. Jumysqa ornalastyrý sharalary usynyldy. Biraq atalǵan otbasy bas tartty. Olar Almatydan ketip qaldy. Buryn Shymkentte turǵan eken, sonda oraldy. Eshkim eshqandaı qysym jasaǵan joq. Mundaı sheshimdi qabyldaǵan — ózderi. Nege olaı istegenin bilmeımin. Úı ishiniń jeke máselesi. Múmkin ata-anasy shaqyrǵan shyǵar. Kúni keshe Shymkent qalasynyń jumyspen qamtý jáne áleýmettik qorǵaý basqarmasy olardyń atalǵan shaharǵa qonys aýdarǵanyn rastady, — dedi ol.
Sonymen birge, Erbol Tuıaqbaev áıeldiń jumys isteýine mınıstrliktiń eshqandaı qarsylyǵy joq ekenin atap ótti. Alaıda jaýapty organ áıel jumys istese, ana men balanyń qaýipsizdigine mán beredi.
Aıta keteıik, buǵan deıin Eńbek jáne halyqty áleýmettik qorǵaý birinshi vıtse-mınıstri Qazaqstanda eńbek kitapshalaryn qoldanystan shyǵaryp, azamattardyń eńbek ótilin tsıfrlyq formatta tirkeý josparlanyp otyrǵanyn málimdegen edi.
