Sábılerdiń qylyǵyna eriksiz súısinesiń - zaǵıp massajıst Ámına Ábıeva

QYZYLORDA. QazAqparat ­ Qyzylorda oblystyq balalar aýrýhanasynda massajıst qyzmetin atqaratyn Ámına Ábıevany áriptesteri erekshe baǵalaıdy. Qos janary kórmeıtin zaǵıp jan óz isiniń sheberi retinde kópshilik arasynda úlken qurmetke ıe bolyp otyr, dep habarlaıdy QazAqparat tilshisi.

Ámına 1985 jyly 20 qańtarda Qyzylorda qalasynda dúnıege kelgen. Oblys ortalyǵyndaǵy №43 mekteptiń tabaldyryǵyn 1991 jyly attaǵan ol ony bitirgennen keıin «Bolashaq» ýnıversıtetin tehnolog-ınjener mamandyǵy boıynsha támamdady. Bala kezinen úı sharýasyna ıkemdi boıjetken tigin tigip, dámi til úıiretin tátti taǵamdardy daıyndaǵandy jany qalaıtyn. Qoly qalt etkende jan­dúnıesin baıytyp, kitap oqyǵandy durys kóretin.

Qashanda alǵa umtyla biletin jigerli minezimen keleshekke arman­maqsatyn josparlaıtyn. Óziniń alǵan mamandyǵyna sáıkes tigin salasynda jemisti eńbek etip, ataqty dızaıner bolýǵa talpynys bildirip júretin.

Taǵdyrdyń jazýymen qos janary kórmeıtin kúıge túskende de jigeri muqalǵan joq. Oǵan eshbir moıymady. Óziniń múmkindigine qaraı mamandyq alýǵa kóńil bóldi. Osylaısha Almatydaǵy zaǵıp jandarǵa arnalǵan respýblıkalyq medıtsınalyq kolledjge oqýǵa túsip, massajıst mamandyǵyn alyp shyqty. Qyzyl dıplomǵa qol jetkizdi.

Ǵylymǵa súıensek, zaǵıp jandardyń sezý qabileti joǵary bolady. Ásirese, saýsaqtarynyń sezimtaldyq qasıeti erekshe. Ámına sondaı sezimtal qasıetiniń arqasynda kópshiliktiń alǵysyna bólenip júr. Ol jasaǵan massaj talaı náresteniń dertine daýa boldy. Ol oblystyq balalar aýrýhanasynda 2018 jyldan beri qyzmet atqarady.

«Ózim balajan adammyn. Sábıler perishte ǵoı, bal tatyǵan qylyǵyna eriksiz súısinesiń. Keleshekte óz kásibimdi ashsam degen oıym bar. Ózimniń baspanam bolsa dep armandaımyn», - deıdi ol.