Sábılerdi 2 jastan bastap balabaqshamen qamtý mindeti bekitildi - mınıstr

ASTANA. QazAqparat – Memleket basshysynyń saılaýaldy baǵdarlamasynda bilim salasyn damytý men balalardyń ál-aýqatyn arttyrýǵa erekshe kóńil bólingen. Endi osy baǵdarlama belsendi túrde júzege asyrylady. Bul týraly oqý-aǵartý mınıstri Ashat Aımaǵambetov áleýmettik jelidegi paraqshasynda jazdy, dep habarlaıdy QazAqparat.

Birinshiden, buǵan deıin basty nazar 3-6 jasqa deıingi balalardy qamtý bolsa, endi 2 jastan bastap balabaqshamen qamtý mindeti bekitildi. Bul baǵytta mektepke deıingi uıymdardy ashý, onyń ishinde ásirese jekemenshik balabaqshalarǵa memlekettik tapsyrysty ornalastyrý boıynsha jumys uıymdastyrylady. Qabyldanǵan sharalardyń nátıjesinde 2029 jyldyń sońyna deıin 2-6 jas aralyǵyndaǵy balalar mektepke deıingi tárbıemen jáne oqytýmen 100% qamtylady. Mektepke deıingi uıymdarda oryndardy ashýǵa arnalǵan naqty jospar ázirlendi. Qyzmetterdiń sapasyn arttyrý úshin memlekettik tapsyrysty ornalastyrýdyń normatıvtik talaptary kúsheıtildi. Memlekettik tapsyrysty ornalastyrý tetigi «Aqsha balanyń sońynan eredi» qaǵıdasyna ózgertildi, ıaǵnı qarajat ata-ana tańdaǵan balabaqshalarǵa jiberiledi

, - dep jazǵan mınıstr.

Sondaı-aq, mektepke deıingi tárbıe men oqytýdyń jańa modeli engizilip, jańa memstandart pen úlgilik baǵdarlamalar qabyldanǵan. Al, balabaqshalardaǵy oryndardy bólýdiń biryńǵaı jáne yńǵaıly aqparattyq júıesi qurylmaq.

Bul balabaqshalardaǵy oryndarǵa monıtorıng júrgizýge, jyldam ári yńǵaıly kezekke qoıýǵa, oryndardy bólý kezinde sybaılas jemqorlyq táýekelderin boldyrmaýǵa, balalardyń kezekke qaıtalanyp turýyn boldyrmaýǵa múmkindik beredi. Óńirlerdiń balabaqshaǵa turǵan kezegi boıynsha derekteri densaýlyq saqtaý, eńbek jáne halyqty áleýmettik qorǵaý, qorǵanys, quqyq qorǵaý mınıstrlikteriniń derekter bazalarymen biriktiriledi. Balabaqshaǵa kezekke turý, kezek kelgennen keıin balabaqshany tańdap, joldama alý qyzmetin egov qosymshasynan da, bank qosymshalarynan da alýǵa múmkindik bolady

, - deıdi Ashat Aımaǵambetov.