Sábıler qosymsha ekpe alady: Elde qyzylshaǵa qarsy vaktsınatsııa kúsheıtildi
ASTANA. KAZINFORM — Qyzylsha boıynsha aǵymdaǵy epıdemıologııalyq jaǵdaıǵa jaýap retinde Densaýlyq saqtaý mınıstrligi epıdemııaǵa qarsy jáne sanıtarııalyq-profılaktıkalyq is-sharalar keshenin keńeıtti.
Vedomstvo málim etkendeı, jaǵdaı turaqtalǵanǵa deıin 6-10 aılyq balalardy qosymsha ımmýndaý engizildi, buryn egilmegen 2-5 jáne 7-18 jastaǵy balalardy, sondaı-aq rastalǵan ımmýndaýsyz 30 jasqa deıingi medıtsına qyzmetkerlerin tolyqtyryp vaktsınatsııalaý uıymdastyryldy.
Uıymdastyrylǵan ujymdar men áskerı bólimderde vaktsınatsııalanbaǵan adamdardy ýaqytsha shettetýdi qosa alǵanda, josparly emdeýge jatqyzýǵa jáne epıdemııaǵa qarsy rejımge qoıylatyn talaptar kúsheıtildi.
— Qabyldanǵan sharalardy iske asyrý qazirdiń ózinde oń nátıje kórsetip otyr. Aldyńǵy aptamen salystyrǵanda (417 jaǵdaı) qyzylshanyń tirkelgen jaǵdaılarynyń sany 311-ge deıin tómendedi, bul 106 jaǵdaıǵa az (-25,4%). Tómendegenine qaramastan, epıdemıologııalyq jaǵdaıdy turaqtandyrýǵa áli qol jetkizilgen joq. Jaǵdaılardyń eń kóp sany Astana qalasynda tirkeldi — 81 jaǵdaı, Almaty qalasynda — 48 jaǵdaı, Almaty oblysynda — 57 jaǵdaı, Batys Qazaqstan oblysynda — 29 jaǵdaı, Atyraý oblysynda — 57 jaǵdaı jáne Qostanaı oblysynda — 57 jaǵdaı. Patsıentterdiń negizgi úlesin 14 jasqa deıingi vaktsınatsııalanbaǵan balalar quraıdy, — delingen mınıstrlik habarlamasynda.
2026 jyldyń basyndaǵy jaǵdaı boıynsha qosymsha ımmýndaýmen 6-11 aılyq 36,7 myń bala, josparly vaktsınatsııalaýmen — 1 jastaǵy 21,4 myń bala (6,7%) jáne 6 jastaǵy 17 myń bala (4,7%) qamtyldy.
18 jasqa deıingi 8,1 myń adam tolyqtyryp ımmýndaýmen qamtyldy. Bul baǵyttaǵy jumys jalǵasýda.
Mınıstrlik ahýalǵa monıtorıng júrgizýdi jáne den qoıý sharalaryn úılestirýdi jalǵastyrady. Ýaqtyly vaktsınatsııalaý jáne azamattardyń profılaktıkaǵa jaýapkershilikpen qaraýy halyqtyń densaýlyǵyn saqtaýdyń jáne qyzylshanyń odan ári taralýynyń aldyn alýdyń negizgi sharttary bolyp qala beredi.
Budan buryn qyzylshaǵa qarsy ekpesi joq balalar josparly emdeýge statsıonarǵa qabyldanbaıtyny aıtyldy.