Sabılıanov: Kásipkerlikti qoldaý baǵdarlamalaryn jıi ózgertý tıimsiz
Mundaı usynysty búgin Májilistegi Úkimet saǵatynda depýtat Nurtaı Sabılıanov jasady, dep habarlaıdy QazAqparat.
«Shaǵyn jáne orta bıznesti qoldaý boıynsha Úkimet qabyldaıtyn qoldanystaǵy baǵdarlamalardyń alýan túrliligi, olarǵa ózgeristerdiń jıi engizilýi atalǵan baǵdarlamalardy tartymdy, tıimdi etpeıdi, al qoldaý kórsetý quraldary áleýetti kásipkerler úshin qoljetimdi bolmaıdy. Mysaly, Úkimet mynadaı baǵdarlamalardy qabyldady: «Bıznestiń jol kartasy - 2020». Bul baǵdarlamaǵa 2010 jyldan beri 21 ret bıznes sýbektileriniń qatysý sharttaryn ózgertetin ózgerister men tolyqtyrýlar engizildi. Qujattyń formaty úsh márte túbegeıli qaıta qaraldy. Tek sońǵy eki jylda 6 ret ózgeris engizilip, sonyń saldarynan atalǵan baǵdarlamanyń ataýy ózgertildi. «Jumyspen qamtý- 2020» jol kartasy, eki jyl ishinde 3 ret ózgeris engizildi. Jumyspen nátıjeli qamtýdy jáne jappaı kásipkerlikti damytýdyń 2017- 2021 jyldarǵa arnalǵan baǵdarlamasynyń qabyldanýyna baılanysty onyń kúshi joıyldy», - dedi depýtat.
Onyń atap ótýinshe, Agroónerkásip keshenin damytý jónindegi 2013 - 2020 jyldarǵa arnalǵan baǵdarlama da keıinnen ataýy «Agrobıznes - 2017» agroónerkásip keshenin damytý jónindegi baǵdarlama bolyp ózgertildi jáne úsh jyl ishinde oǵan da 3 ret ózgeris engizildi. Onyń ústine osy baǵdarlamanyń birinshi kezeńin iske asyrý kezinde qarjylyq buzýshylyqtar 21,5 mlrd. teńge; rásimdik buzýshylyqtar 35,9 mlrd. teńge; bıýdjet qarajaty men aktıvterdi tıimsiz paıdalaný 53 mlrd. teńge somasynda anyqtaldy. Qazirgi ýaqytta Qazaqstan Respýblıkasynyń agroónerkásiptik keshinin damytýdyń 2017-2020 jyldarǵa arnalǵan taǵy bir memlekettik baǵdarlamasy qabyldandy.
Daǵdarystan keıingi qalpyna keltirý baǵdarlamasy boıynsha, 2011-2016 jyldar aralyǵynda respýblıkalyq bıýdjetten 55 jekemenshik kásiporynǵa 70 mlrd. teńgeden astam somaǵa sýbsıdııa bólindi. Sýbsıdııalanǵan kompanııalar sanynyń jartysynan astamy óndiristik emes saladan boldy. Bıýdjetke túsetin salyqtyq túsimderdiń aıtarlyqtaı ulǵaıýy jáne osy kompanııalarda jumys oryndarynyń artýy bolmady. Kásipkerlikti memlekettik qoldaý sharalary jónindegi qoldanystaǵy baǵdarlamalardy júıelendirip, mysaly yńǵaıly, túsinikti ári qoljetimdi bolatyn «Kásipkerdiń jol kartasy» atty bir biryńǵaı qujatqa biriktirýdiń ýaqyty keldi. Bul turǵyda 10 zańnyń bir Kásipkerlik kodekske biriktirilgenin mysal retinde keltirýge bolady», - dedi Sabılıanov.
