Sábıdiń salmaǵy 4 keli, isigi 2 keli: Almatyda kúrdeli ota jasaldy
ASTANA. KAZINFORM — Almaty dárigerleri 2 kelilik isigi bar náresteni aman alyp qaldy, dep habarlaıdy Densaýlyq saqtaý mınıstrliginiń baspasóz qyzmeti.
18 tamyzda salmaǵy tórt keliden asatyn qyz bala segizkóz-quıymshaq tusyndaǵy úlken túzilispen dúnıege keldi. Ol ómirge kelgen alǵashqy sátten bastap ómir úshin kúresti. Týa bitken mundaı túzilis náreste týǵan kezde qaterli isik bolyp sanalmasa da, ómiriniń alǵashqy alty aıynda qaterli isikke aınalýy ábden múmkin. Sondyqtan mundaı túzilisi bar nárestege otany sozbalańǵa salmaı jasaý qajet. Bala týǵannan keıin birneshe saǵat ishinde neonataldyq reanımatologtar men hırýrgterden quralǵan top perzenthanaǵa baryp, náresteni Almaty Balalar shuǵyl medıtsınalyq kómek kórsetý ortalyǵyna jetkizdi. Qyz bala jańa týǵan náresteler reanımatsııasy bólimine jatqyzylyp, kúrdeli otaǵa daıyndyq bastaldy. Kelesi kúni dárigerler isikti alyp tastady.
— Segizkóz-quıymshaq aımaǵynda ornalasqan teratomanyń quramynda súıek, jumsaq tinder jáne kıstozdy qýys sekildi túrli tin bar. Bul tájirıbemizdegi eń kúrdeli otanyń biri boldy. Іsiktiń salmaǵy eki keli boldy, ıaǵnı náresteniń óz salmaǵymen birdeı deýge bolady. Qyzdyń týǵan kezdegi salmaǵy tórt keli edi, demek, onyń teń jartysyn isik quraǵan. Ota sátti ótti. Іsikti alyp tastaǵannan keıin birden plastıka jasadyq. Tigis orny bilinbeıtindeı etip qalpyna keltirildi. Bolashaqta bul nárestege eshqandaı qolaısyzdyq týdyrmaıdy. Qazir balanyń jaǵdaıy jaqsy, ol úıine shyqqaly jatyr, — dedi Balalar shuǵyl medıtsınalyq kómek kórsetý ortalyǵy bólimshesiniń meńgerýshisi Samatbek Myrzahmet.
Otany jasaǵan dárigerler: hırýrg Samatbek Myrzahmet, assıstent Begaly Tórebek, anestezıolog-reanımatolog Ulyqpan Álseıtov. Náresteniń emdeýshi dárigerleri — Aıjan Seksenbaeva men Edgor Saıdakbarov. Ota eki saǵattan astam ýaqytqa sozyldy. Hırýrgter men reanımatologtardyń asa muqııat ári dál jumysynyń arqasynda náreste salmaǵy eki keli bolatyn alyp isikten aryldy. Teratoma náresteniń ana qursaǵyndaǵy kezinde qalyptasqan. Ol júktiliktiń 20-aptasynda júrgizilgen skrınıng kezinde anyqtalǵan. Ata-anasy júktilikti saqtap qalý úshin qoldan kelgenniń bárin jasady. Birneshe ret dárigerler keńesine qatysyp, Balalar shuǵyl medıtsınalyq kómek kórsetý ortalyǵynyń hırýrgterinen keńes aldy. Dárigerler júktilik boıy ana men balanyń densaýlyǵyn muqııat baqylap otyrdy. Júktiliktiń 34-aptasynda qyz bala kesar tiligi arqyly dúnıege keldi.
— Bul tórt uldan keıin kópten kútken qyzymyz. Júktiliktiń 20-aptasynda dárigerler segizkóz-quıymshaq teratomasyn anyqtady. Sol boıda Balalar shuǵyl medıtsınalyq kómek kórsetý ortalyǵyna keńes alýǵa keldik. Jalpy, júktiligim jaqsy ótti. 34-aptada ishim aýyryp, perzenthanaǵa bardym. Dárigerler birden kesar tiligin jasap, balam ekeýmizdi osynda jetkizdi. Qyzymdy aman alyp qalǵan osy aýrýhananyń dárigerlerine alǵysym sheksiz. Bala týǵannan keıin ony da, denesindegi alyp isikti de kórdim. Qyzymnyń emine atsalysqan barsha janǵa raqmet, — deıdi Alaýdyń anasy Aıajan.
Aıta keteıik, segizkóz-quıymshaq teratomasy — jańa týǵan nárestede jıi kezdesetin isiktiń biri. Ol ana qursaǵynda qalyptasyp, nárestemen birge ósýi múmkin. Keı jaǵdaıda aýyr asqynýǵa ákelip, ómirlik mańyzdy aǵzalardyń qyzmetin buzady. Bul joly túzilis óte úlken kólemge deıin ósken. Jyl basynan beri Almaty Balalar shuǵyl medıtsınalyq kómek kórsetý ortalyǵynyń jańa týǵan náresteler bólimine 96 bala jetkizilgen. Olardyń 72-sine hırýrgııalyq em qajet bolǵan. Týa bitken aqaýdyń paıda bolýyna tuqymqýalaýshylyq, ınfektsııa jáne basqa da ishki-syrtqy faktorlar áser etýi múmkin.
Buǵan deıin jyl saıyn týa bitken aýrýlary bar 1,5 myń nárestege kúrdeli ota jasalatyny habarlandy.
