Sábıdi hıdjama ádisimen emdeý deregi boıynsha tekseris aıaqtaldy

ASTANA. QazAqparat – Atyraýda sábıdi hıdjama ádisimen emdeý deregine qatysty tekserý aıaqtaldy. Bul týraly QR DSM Medıtsınalyq jáne farmatsevtıkalyq baqylaý komıteti tóraǵasynyń mindetin atqarýshy Laýra Ahmetnııaz aıtty, dep habarlaıdy QazAqparat tilshisi.

«Atyraý oblysy prokýratýrasynyń suraýy boıynsha bul fakti tekserildi. Tekserý is-sharalary aıaqtaldy. Onyń nátıjesi boıynsha zańsyz medıtsınalyq qyzmet jasalǵanyn anyqtadyq. Hıdjama ádisin óz uıymyna lıtsenzııa almaǵan medbıke júrgizgen. Sonymen qatar, onyń tıisti qyzmetpen aınalysýyna ruqsat beretin sertıfıkaty da bolmaǵan», - dedi L. Ahmetnııaz.

Onyń aıtýynsha, tekseris aıasynda atalǵan fakti boıynsha ákimshilik aıyppul salyndy. Materıaldar prokýratýraǵa, polıtsııa departamentine joldandy.

«Endi biz aýmaqtyq departamentpen birlese otyryp osy máseleni pysyqtap, atalǵan tásilge qatysty ortalyqtyń qyzmetine tyıym salý týraly sotqa talap-aryz túsiremiz», - dedi komıtet basshysy.

Budan buryn habarlanǵandaı, Atyraýda náresteni hıdjama tásili arqyly emdeý faktisine qatasty QR Densaýlyq saqtaý mınıstri Ajar Ǵınııat pikir bildirdi.

«Búginde adamdar dástúrli emes medıtsınamen aınalysyp júr. Qalaı bolǵanda da olar medıtsınalyq kómek kórsetse, tıisti lıtsenzııany alýy kerek. Qazirgi kezde lıtsenzııalanatyn medıtsınalyq qyzmetke hıdjama jatpaıdy. Sondyqtan Komıtet (medıtsınalyq-farmatsevtıkalyq baqylaý) bul derekti qarap, tekserý júrgizedi. Aldaǵy ýaqytta osy máselelerdi qarastyratyn bolamyz», - dedi A. Ǵınııat.

Foto: hidzhame.ru