Sábı ushaq bortynda dúnıege keldi
NUR-SULTAN. QazAqparat - Rıo-de-Janeırodan Chılı astanasy Santıagoǵa bara jatqan ushaq Portý-Alegrıge (Brazılııa) qonýǵa májbúr boldy. Ushaq bortynda sábı dúnıege kelgen. Bul týraly G1 Brazılııa jańalyqtar portaly habarlady.
Jas ana otbasymen Brazılııadan Chılıge demalystan qaıtyp bara jatqan. Áıel júktiliktiń 8-shi aılyǵynda bolǵan, dáriger oǵan ushaqpen saıahattaýǵa ruqsat etetin anyqtama bergen. Ushaq San-Paýlý tranzıttik áýejaıynan ushqannan keıin tolǵaǵy bastalǵan. Abyroı bolǵanada, borttaǵy jolaýshylar arasynda jedel járdemniń eki qyzmetkeri men medbıke bar bolyp shyqty. Olar sábıdiń ómirge kelýine kómektesken.
Bort 10 mınýt ótken soń Portý-Alegrıge shuǵyl qonyp, bosanǵan áıel sábıimen birge aýrýhanaǵa jetkizildi.
Ana men balanyń jaǵdaıy jaqsy. Sábıdiń eki azamattyǵy bolady – Brazılııa jáne Chılı, sebebi ol Brazılııa aýmaǵynyń ústimen ushyp bara jatqan shaqta ómirge keldi.
