Sábı túnde qatty jylasa ata-anasyna aıyppul salyna ma

ASTANA. KAZINFORM — Áleýmettik jelilerde balanyń qatty jylaǵany úshin ákimshilik jaýapkershilikke tartý týraly aqparat taralyp jatyr. Osyǵan oraı Abaı oblysy Polıtsııa departamenti túsinikteme berdi.

Vedomstvo málimetinshe, tynyshtyqty buzǵany úshin jaýapkershilikti kózdeıtin zań normasy durys túsindirilmegen.

— Qazaqstannyń Ákimshilik quqyq buzýshylyq týraly kodeksiniń 437-babyna sáıkes, saǵat 22:00-den 9:00-ge deıin úıde nemese onyń mańynda adamdardyń tynyshtyǵyn buzatyn, qajetsiz jáne shý shyǵarýshy áreketter quqyq buzýshylyq bolyp sanalady. Polıtsııa tekserý júrgizý úshin jeke nemese uıym tarapynan túsken habarlama nemese aryzǵa súıenedi. Ár habarlama muqııat qaralyp, istiń jaǵdaıy jan-jaqty tekseriledi. Shý deńgeıi úshin arnaıy kúndiz jáne túngi ýaqyttaǵy shekteýler bar. Al sábılerdiń jylaýy ákimshilik jaýapkershilikke tartýǵa sebep bolmaıdy, — dep túsindirdi oblystyq Polıtsııa departamenti.

Budan buryn Qostanaıda qar jaýýyna baılanysty polıtsııa qyzmeti kúsheıtilgenin jazǵan edik.