Sábı saýdasy, vebkam jáne qanaý: ІІM rezonansty isterdi áshkereledi
ASTANA. KAZINFORM — Qazaqstanda «STOP trafık» operatsııasy aıasynda adam saýdasyna qatysty ondaǵan qylmystyq shema áshkerelendi. Sábıdi satý, májbúrli eńbekke jegý, vebkam-stýdııa uıymdastyrý jáne jastardy zańsyz áreketterge tartý derekteri anyqtalyp, birqatar kúdiktiler ustaldy. Bul týraly Polisia.kz jazdy.
Cáýir aıynda el aýmaǵynda ІІM tarapynan kezekti aýqymdy «STOP trafık» jedel-profılaktıkalyq is-sharasy uıymdastyryldy. Nátıjesinde adam saýdasyna qatysty 41 qylmys tirkelip, onyń ishinde kámeletke tolmaǵandarǵa qatysty 9 derek anyqtaldy.
— Qyzylorda oblysynda jańa týǵan sábıdi satý shemasy áshkerelendi. Anyqtalǵandaı, 25 jastaǵy áıel bala týǵanǵa deıin jáne týǵannan keıin mamandandyrylǵan qoǵamdyq qorda turǵan. Onyń baladan bas tartýyna baılanysty qor jetekshisi deldal retinde áreket etip, sábıdi asyrap alý maqsatynda oblystyń 50 jastaǵy turǵynyna bir mıllıon teńgege satýdy usynǵan. Úsheýi de ýaqytsha ustaý ızolıatoryna qamaldy, — dedi ІІM uıymdasqan qylmysqa qarsy kúres departamentiniń ókili Qýandyq Alpys.
Almaty qalasynda qylmystyq maqsatta paıdalaný úshin adam saýdasymen aınalysqan uıymdasqan topqa qatysty sotqa deıingi tergeý bastaldy. Qylmystyq toptyń zańsyz áreketi turaqty mekenjaıy joq azamattardy izdep taýyp, olardyń jalǵan oń nesıe tarıhyn qalyptastyryp, keıin sol adamdardyń atyna Almaty jáne Shymkent qalalarynda qymbat avtokólikter rásimdep, odan ári satýǵa baǵyttalǵan. Qazirgi ýaqytta negizgi uıymdastyrýshylar ustaldy. Tergeý jalǵasyp jatyr.
Jetisý oblysynda jedel-izdestirý is-sharalary barysynda 2005 jáne 2007 jyly týǵan jergilikti eki turǵynǵa qatysty májbúrli eńbek faktisi anyqtalyp, joly kesildi. Anyqtalǵandaı, olardy urlap áketip, bir aı boıy kúsh qoldaný arqyly zańsyz bostandyǵynan aıyryp, turmystyq hımııa óndirisinde jumysqa jekken. Osy fakt boıynsha adamdy qanaý maqsatynda urlaý deregimen qylmystyq is qozǵaldy. Kúdiktiler ýaqytsha ustaý ızolıatoryna qamaldy. Jábirlenýshilerge medıtsınalyq kómek kórsetildi.
— Jastardy destrýktıvti jáne azǵyndyq sıpattaǵy áreketterge tartýmen, sondaı-aq qoǵamnyń moraldyq-adamgershilik ahýalyna, otbasy ınstıtýtyna jáne óskeleń urpaq tárbıesine teris áser etetin ózge de zańsyz qyzmet túrlerimen aınalysatyn tulǵalar men toptardy anyqtaýǵa erekshe nazar aýdarylýda, — dedi Qýandyq Alpys.
Abaı oblysynda júıeli tabys tabý maqsatynda Qazaqstannyń birneshe qalasynda vebkam bızneske arnalǵan pornostýdııalar uıymdastyrǵan erli-zaıyptylar ustaldy. Olar ózara mindetterdi bólise otyryp, modeldik kelbeti bar jas qyzdardy izdeýmen jáne osy iske tartýmen, sondaı-aq pornografııalyq sıpattaǵy túsirilimder júrgizýge arnalǵan oryndardy uıymdastyrýmen aınalysqan. Sotqa deıingi tergeý jalǵasady.
Sondaı-aq Astana men Almaty qalalarynda, Abaı, Atyraý, Jambyl, Pavlodar jáne Mańǵystaý oblystarynda dástúrli emes seksýaldyq baǵdardaǵy zańsyz áreketterge jáne jastardy azǵyndatýǵa belsendi túrde tartylǵan kúdiktilerge qatysty 20 qylmystyq is qozǵaldy. Adamnyń ımmýn tapshylyǵy vırýsyn (AITV) juqtyrý faktisi boıynsha 15 sotqa deıingi tergep-tekserý jáne pornografııalyq materıaldardy zańsyz taratý boıynsha 5 sotqa deıingi tergep-tekserý bastaldy.
— Adam saýdasyna qarsy is-qımyl, azamattardyń quqyqtaryn qorǵaý, qoǵamdyq qaýipsizdikti qamtamasyz etý jumystary jalǵasýda, — dedi spıker.
Aıta keteıik, jaqynda osyndaı ózekti másele Jibek Joly arnasyndaǵy «Pravda v detalıah» baǵdarlamasynda talqylanǵan bolatyn.
