Sábı satylatyny týraly habarlandyrý bergen: Bezbúırek ana ızolıatorǵa qamaldy
Іshki ister mınıstrligi Krımınaldyq polıtsııa departamenti kıberqylmysqa qarsy kúres ortalyǵynyń bastyǵy Jandos Súıinbaı bala satý kúdigimen qamaýǵa alynǵan eki áıeldiń oqıǵasyn aıtyp berdi, dep habarlaıdy Kazinform.
«Uıymdasqan qylmysqa qarsy kúres basqarmasynyń qyzmetkerleri Almaty oblysynda jańa týǵan náresteni satý faktisin anyqtady. Tekserý kezinde 24 jastaǵy oblys turǵyny júktiliktiń jetinshi aıynda saıtqa bala satatyny týraly habarlandyrý ilip, satyp alýshyny izdeı bastaǵan. Osylaısha balasy joq jupty taýyp, kezdesý kezinde balanyń aqysyna kredıt bereshegin jabý týraly kelisimge keledi. Qazan aıynda náresteni atalǵan juptyń qolyna asyrap alýǵa tapsyrady. Bul fakti Sotqa deıingi tergep-tekserýlerdiń biryńǵaı tizilimine «Kámelet jasyna tolmaǵandardy satý» babymen tirkelip, sotqa deıingi tergep, tekserý bastaldy. Kúdikti áıel ýaqytsha ustaý ızolıatoryna alyndy», – dedi ol vedomstvonyń apta saıyn ótetin brıfıngisinde.
Osyǵan uqsas jaǵdaı Shymkent qalasynda da bolǵan.
«Jańa týǵan náresteni satýdyń taǵy bir faktisi Shymkent qalasynda tirkeldi. Uıymdasqan qylmysqa qarsy kúres basqarmasynyń qyzmetkerleri anyqtaǵandaı, 23 jastaǵy áıel balasyn satyp alatyn adam izdep, deldal arqyly ózge oblystyń 45 jastaǵy turǵynyn tapqan. Ekeýi kezdesip, saýda mámilesin jasaıdy. Bul fakti Qylmystyq kodekstiń 135-baby boıynsha tirkeldi. Sotqa deıingi tergeý bastaldy. Náreste sábıler úıinde. Kúdiktiniń buǵan deıin birneshe ret alaıaqtyq úshin jaýapqa tartylǵany, moınynda qomaqty qaryzy bar ekeni belgili boldy. Qazirgi tańda ol – qamaýda», – dedi Jandos Súıinbaı.
