Sabaq ústinde 4 oqýshy esten tanyp qulaǵan - Pavlodar oblysy
ASTANA. QazAqparat - Paramonovka aýylynda 6-synypta oqıtyn tórt oqýshy Aqsý qalasynyń aýrýhanasyna jetkizildi, dep habarlaıdy pavlodarnews.kz.
Balalardyń ne sebepti qulaǵany belgisiz. Orys tili sabaǵy ótip jatqan kezde bir bala esinen tanyp qalǵan. Men barǵan kezde qulap jatty. Sý ákelip bergen soń esin jınady. Birazdan soń birinen soń biri úsh balanyń jaǵdaıy nasharlaı bastady. Dereý Qalqaman aýyldyq aımaǵynan jedel járdem shaqyrttyq», - deıdi óziniń aty-jónin aıtýdan bas tartqan tárbıe isiniń meńgerýshisi.
Aqsý qalasy aýrýhanasy statsıonary bas dárigeriniń mindetin atqarýshy Baqytjamal Nuraldınovanyń aıtýynsha, keshe keshki saǵat jetide tórt qyz bala jetkizilgen. Olardyń úsheýi dıagnostıkalyq palataǵa jatqyzyp, baqylaýǵa alynǵan. Tórtinshi balaǵa «lakýnarly angına» dıagnozy qoıylyp, juqpaly aýrýlar bólimshesine ornalastyrylǵan. - Barlyq saraptama tapsyrylyp, eshbir aqaý anyqtalmady. Qazirgi tańda jaǵdaılary jaqsy. Búgin úsheýi aýrýhanadan shyǵarylady. Aldyn ala "ysty gazben ýlanǵan" degen dıagnoz qoıylǵan. Degenmen bul rastalmady. Ári qaraı anyqtaı bastaǵanymyzda ot jaǵatyn qazandyqtyń mektepten tys jeke ǵımaratta ornalasqany belgili boldy. Sondyqtan olardyń ystan ýlanýy múmkin emes, - deıdi Baqytjamal Nuraldınova.
Aq jeleńdilerdiń aıtýynsha, bul jaǵdaı mektep ishindegi janjalǵa baılanysty oryn alýy múmkin.
