«S5+1» formaty Ortalyq Azııa men AQSh arasyndaǵy ózara is-qımyldyń tetigi - SІM
Syrtqy ister mınıstrliginde Qazaqstan Syrtqy saıası vedomstvosynyń basshysy Beıbit Atamqulov, Túrikmenstannyń Mınıstrler kabıneti tóraǵasynyń orynbasary – Syrtqy ister mınıstri Rashıd Meredov, Qyrǵyzstannyń syrtqy saıası vedomstvo basshysy Chıngız Aıdarbekov, Tájikstannyń - Sırodjıddın Mýhrıddın, Ózbekstannyń - Abdýlazız Kamılov jáne AQSh Memlekettik hatshysynyń orynbasary Devıd Heıldiń qatysýymen joǵary deńgeıdegi «S5+1» kezdesýi boldy.
Joǵary deńgeıdegi kezdesýde Qazaqstan syrtqy saıası vedomstvosynyń basshysy «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev Qazaqstannyń syrtqy saıasatyndaǵy Ortalyq Azııa vektorynyń irgeli basymdyǵyn qalaǵanyn» atap ótti.
Mınıstrdiń aıtýynsha, «Elbasy baǵyty sabaqtastyǵynyń myzǵymastyǵy QR Prezıdenti Qasym-Jomart Toqaevtyń aımaqtyq strategııasy negizinde jatyr. Bizdi kórshilerimizben aımaqtyq saıası, ekonomıkalyq jáne gýmanıtarlyq yntymaqtastyqtyń qarqyndy damýy shabyttandyrady». Sondaı-aq, bizdiń óńirimizdiń ekijaqty jáne kópjaqty formattary barysynda qol jetkizilgen barlyq bastamalar men ýaǵdalastyqtardy sapaly júzege asyrýǵa Qazaqstannyń qyzyǵýshylyǵy atap ótildi.
«S5+1» ótken kezdesýde saýda baılanystaryn odan ári keńeıtý, ınvestıtsııalardy tartý jáne óńirdegi kópjaqty ekonomıkalyq jobalardy iske asyrý múmkindikteri talqylandy. Taraptar Ortalyq Azııanyń ınfraqurylymyn jáne tranzıttik-kóliktik áleýetin birlesip damytýǵa úlken qyzyǵýshylyq bildirdi.
Qaýipsizdik salasynda kezdesýge qatysýshylar óńirlik tásildi talap etetin syn-qaterler men qaýipterdiń keń keshenin qarastyrdy. Onyń ishinde Aýǵanstandy qalpyna keltirýge kómek kórsetý, sondaı-aq Sırııa men Iraktaǵy urys qımyldary aımaǵynan oralǵan azamattardy qaıta oralý jáne ońaltý boıynsha tájirıbe almasý máseleleri bar.
Nur-Sultan qalasyna sapary aıasynda AQSh Memlekettik hatshysynyń orynbasary D. Heıldi QR Premer-mınıstri Asqar Mamın, QR Syrtqy ister mınıstri B. Atamqulov jáne QR Tuńǵysh Prezıdenti - Elbasy qorynyń atqarýshy dırektory Áset Isekeshev QR men AQSh-tyń ekijaqty jáne halyqaralyq yntymaqtastyǵynyń ózekti máselelerin talqylaý úshin qabyldady.
«S5+1» formaty Ortalyq Azııanyń bes eli men AQSh arasyndaǵy ózara is-qımyldyń kópjaqty tetigi bolyp tabylady. Dıalogtyń negizgi taqyryptary Ekonomıkalyq damý, óńirlik yntymaqtastyq jáne qaýipsizdik máseleleri bolyp tabylady. Alty eldiń syrtqy saıası vedomstvolary basshylarynyń qatysýymen alǵashqy otyrys 2015 jylǵy 1 qarashada Samarqand qalasynda ótti.
