Іs júzinde joq joldy 328 mln teńgege jóndemek bolǵan - prokýratýra

QARAǴANDY. KAZINFORM — Aqtoǵaı aýdany prokýratýrasynyń narazylyǵy boıynsha aýdannyń Ekonomıka jáne qarjy bóliminiń jalpy somasy 328 mıllıon teńgeden asatyn is júzinde joq «Aqjaryq-Appaz» tas jolyn aǵymdaǵy jóndeýge ashyq konkýrs ótpeı qaldy. Bul týraly Qaraǵandy oblysynyń prokýratýrasy habarlady. 

Joldyń bul ýchaskesinde jergilikti jáne oblystyq deńgeıdegi ýákiletti organdardyń balansynda eshqandaı jol joq ekeni anyqtaldy.

«Avtomobıl joldary týraly» Zańnyń 1-babyna sáıkes avtomobıl jolyn aǵymdaǵy jóndeý - avtomobıl joldaryndaǵy tótenshe jaǵdaılardyń, aqaýlardyń aldyn alý maqsatynda júrgiziletin jumystar kesheni, sondaı-aq jyl boıy júrgiziletin avtomobıl joldaryn jedel qalpyna keltirý jáne jóndeý, onyń ishinde marshrýttyq ádispen júzege asyrylatyn qıraǵan ýchaskelerdi jóndeý sharalary.

Tıisinshe, aǵymdaǵy jóndeý jumystary qoldanystaǵy tas jolda júrgizilýi kerek.

«Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» Zańnyń 60-babynyń 1-tarmaǵyna sáıkes obektiler men olardyń keshenderiniń qurylysy jobalyq (jobalyq-smetalyq) qujattama boıynsha júzege asyrylady.

Osy normany buza otyryp, ekonomıka bólimi qurylys jobasy joq jańa tas jol salýǵa árekettengen.

Sonymen qatar, qurylys-montaj jumystary olar boıynsha memlekettik satyp alýlar Qazaqstan Respýblıkasy Qarjy mınıstriniń 2022 jylǵy 18 qańtardaǵy №46 buıryǵymen bekitilgen «Reıtıngtik-balldyq júıeni paıdalana otyryp, konkýrs arqyly júzege asyrylatyn taýarlardyń, jumystardyń, qyzmetterdiń» tizbesine engizilgen.

Osyǵan qaramastan, qurylys-montaj jumystary týraly habarlandyrý ashyq konkýrs arqyly ornalastyrylǵan.

Aqtoǵaı aýdany prokýratýrasynyń qadaǵalaý aktisi boıynsha bul konkýrs joıyldy.