S. Táýekel men A.Ybraev Qazaqstan Kınematografısteri odaǵynyń teńtóraǵalary bolyp saılandy
ALMATY. QazAqparat-Almatyda Kıno úıinde Qazaqstan Kınematografısteri odaǵynyń sezi bolyp ótti.
Odaqtyń tóraǵasy men basqarmasyn qaıta saılaý - sezdiń basty taqyrybyna aınaldy.
Úmitkerlerdiń saılaýǵa qatysý týraly ótinimderi men saılaýaldy baǵdarlamalary bıylǵy jyldyń 22 qańtaryna deıin qabyldanǵan bolatyn.
Sonymen, saılaý qorytyndysy boıynsha berilgen daýystar teń tústi. Sondyqtan, delegattar teńtóraǵalyq júıesin usyndy.
Osylaısha, rejısserlar Slambek Táýekel men Ahat Ybraev Qazaqstan Kınematografısteri odaǵynyń teńtóraǵalary bolyp saılandy, - dep habarlady Qazaqstan Kınematografısteri odaǵynyń múshesi, belgili kınorejısser Rashıd Nuǵmanov.
Aıta ketelik, Qazaqstan Kınematografısteri odaǵyn basqarýǵa úmitkerler qatarynda sýretshi-anımator Sálimǵalı Myrzashev, prodıýser Sergeı Ázimov, kınooperator Áýbákir Súleev jáne rejısser Aqan Sataev boldy.
Sezd barysynda Odaqtyń jarǵysyna túzetýler engizilip, bekitildi.
Tanystyra ketelik, Slambek Táýekel - kınorejısser, stsenarıst, prodıýser. 1991-2004 jyldar aralyǵynda «Armysyń, Naýryz!», «Joǵalǵan ólke», «Kıiz úı gımni», «Asanáli» sekildi birqatar derekti fılmderdi túsirgen. Al, óziniń tyrnaqaldy kórkem fılmi - «Batyr Baıandy» 1993 jyly M. Jumabaevtyń poemasynyń jelisi negizinde túsirgen.
2001-2004 jyldarda - «Qazaqkınofest» AQ teńtóraǵasy, QR mádenıet pen ónerge qoldaý kórsetý jónindegi memlekettik qorynyń atqarýshy dırektory, «Qazaqstan respýblıkalyq telekorporatsııasy» AQ basqarma tóraǵasynyń orynbasary, keıin osy telekorporatsııanyń bas prodıýseri qyzmetterin atqarǵan.
2006-2008 jyldary eki serııalyq «Mahambet» kórkem fılmin túsirdi. Fılmniń stsenarııin Qazaqstannyń halyq jazýshysy, tanymal aqyn Oljas Súleımenov jazǵan bolatyn.
Ahat Ybraev - rejısser, prodıýser jáne stsenarıst. 2012 jyly «Ańyzdar kitaby. Qupııa orman» shytyrman oqıǵaly kórkem fılmin túsirgen. Sondaı-aq, «Mozgotrıasy», «Jaqsy adam», «Sanjar men Qaısar», «Núrkenovter otbasy» atty serıaldardy túsirdi jáne olardyń prodıýseri boldy. Budan basqa, «Kún saqshylary» jáne «Marko Polo» kópserııaly fılmderiniń prodıýseri bolyp ta eńbek etken.
