S.Stoılov: Meniń jigitterim qoryqqan joq, naǵyz fýtbol oınady
ASTANA. QazAqparat - ÝEFA Chempıondar Lıgasynyń toptyq kezeńinde óz alańynda Madrıdtiń "Atletıko" klýbyn qabyldaǵan "Astana" əlemdegi ataqty komandamen teń oıyn kórsetti. Osylaısha, tórtinshi kezeńdegi matchta "Astana" men " Atletıko" klýbtary bir-bir upaıǵa ıe boldy.
"Astana-Arena" stadıonynda ótken matchtan keıingi baspasóz məslıhatynda "Astana" klýbynyń bas jattyqtyrýshysy Stanımır Stoılov komandanyń búgingi upaıy búkil Qazaqstannyń upaıy degen oıyn jetkizdi. "Búgin komanda baryn salyp oınady. Uıymdasa oınady, ereje buzbaýǵa tyrysty, jeńiske degen qulshynys pen myqty minez tanyta bildi. Óz deńgeıimizben alyp qaraǵanda, "Atletıko" sııaqty azýly komandaǵa qarsy bar kúshimizdi sala oınadyq. Meniń jigitterim qoryqqan joq, naǵyz fýtbol oınady, baryn saldy. Meniń oıymsha, "Astana"-nyń búgingi upaıy - búkil Qazaqstan fýtbolynyń upaıy", - dedi S.Stoılov. Esterińizge sala keteıik, "Astana" fýtbol klýby ÝEFA Chempıondar Lıgasynyń toptyq kezeńine shyqqan Qazaqstannyń tuńǵysh komandasy.
