Іs sotqa joldandy: Tereńkara ózeniniń boıyndaǵy jerler qaıta qalpyna keledi
ALMATY. KAZINFORM — Almaty oblysynyń Іle aýdanynda Tereńkara ózeniniń arnasyna qurylys jáne turmystyq qaldyq tógý faktileri anyqtaldy. Bul týraly oblys ákimdiginiń resmı saıty jarııalady.
Bul jaǵdaı jergilikti bılik nazarynan tys qalmady. Aşybulaq aýyldyq okrýgi ákimdigi zań buzýshylyqty joıý jáne jerdi qalpyna keltirý (rekýltıvatsııalaý) boıynsha materıaldardy sotqa joldaýǵa daıyndyq júrgizip jatyr.
Másele alǵash ret 2024 jyly Aşybulaq aýyldyq okrýginiń ákimi Bahtııar Qasymbektiń bastamasymen kóterilgen bolatyn. Ol ózen arnasyna jasalǵan zańsyz áreketterge baılanysty birneshe ret baqylaýshy jáne ekologııalyq mekemelerge resmı hattar joldaǵan. Ákimniń bastamasyna birqatar memlekettik organdar nazar aýdaryp, ekologııalyq zań buzýshylyqtarǵa resmı baǵa berildi.
Tekserý barysynda Túımebaev aýylyndaǵy jer teliminiń ıesi aýmaqty óz betinshe tegistep, ózenniń tabıǵı arnasyn ishinara jaýyp tastaǵany anyqtaldy. Mundaı áreketter ózenniń tereńdigi men aǵysyn ózgertedi. Al bul óz kezeginde ekojúıege jáne jergilikti turǵyndarǵa qaýip tóndiredi.
Aşybulaq okrýgi ákimdiginiń málimetinshe, jer ıesi ekologııalyq normalardy buzǵany úshin birneshe ret ákimshilik jaýapkershilikke tartylǵan. 2025 jyly Almaty oblysy boıynsha ekologııa departamentiniń tekserisi nátıjesinde oǵan 275 myń teńge kóleminde aıyppul salynyp, zań buzýshylyqtardy joıý týraly nusqama berilgen. Alaıda bul talap áli kúnge deıin oryndalmaǵan.
— Tabıǵı aýmaqtardyń lastaný faktileri nazardan tys qalmaıdy. Ózen arnasyn qalpyna keltirý jáne tártip ornatý jumystary jalǵasyp jatyr. Ákimdik tarapynan baqylaý kúsheıtiledi, — delingen Aşybulaq aýyldyq okrýgi ákiminiń apparatynda.
Qazirgi tańda barlyq qujattar Balqash-Alakól basseındik ınspektsııasyna, Ekologııa departamentine jáne Almaty oblysy boıynsha jer resýrstaryn basqarý departamentine joldanǵan.
Tereńkara ózeni — Kishi Almaty ózeniniń sol jaq salasy, ol Qapshaǵaı sý qoımasyna quıady. Aşybulaq aýyldyq okrýgi aýmaǵynda ózenniń uzyndyǵy shamamen 17 shaqyrym, al sý qorǵaý aımaǵynyń eni — 120 metr.
Ekologtardyń aıtýynsha, ózen arnasyna kez kelgen aralasý tabıǵı tepe-teńdikke aıtarlyqtaı zııan keltirýi múmkin.
Aıta keteıik, SQO Qyzyljar aýdanynda qaldyqtar polıgony jabylyp, jaqyn mańdaǵy ormandar qoqysqa toldy.