S.Shaıahmetov: Maǵan taǵylǵan aıyptardy tolyq moıyndamaımyn
ASTANA. QazAqparat - Burynǵy Bilim jáne ǵylym vıtse-mınıstri Saıat Shaıahmetov ózine taǵylǵan aıyptarmen tolyq kelispeıdi. Bul týraly ol Astana qalasy № 2 Almaty aýdandyq sotynda ótip jatqan sot otyrysy barysynda málimdedi. Eske salaıyq, sybaılas jemqorlyq boıynsha aıyptalǵan burynǵy eks-vıtse-mınıstr Saıat Shaıahmetovtiń isine qatysty alǵashqy sot otyrysy sýdıa Baqytbek Syzdyqovtyń tóraǵalyǵymen ótýde.
«Men taǵylǵan aıypty tolyqtaı moıyndamaımyn», - dedi sot otyrysy barysynda S.Shaıahmetov.
Sonymen qatar, «Qazaqstan Respýblıkasynyń salynyp jatqan bilim jáne ǵylym nysandary dırektsııasy» JShS bas dırektory Aleksandr Pak pen «ZAK Servıs» JShS burynǵy bas dırektory Roman Kıreev te, sondaı-aq, taǵy bir aıyptalýshy atalǵan JShS qazirgi dırektory Alekseı Týtýbalın de ózderine taǵylǵan aıypty moıyndamaıtyndyqtaryn jetkizdi.
Esterińizge sala keteıik, búgin Astanada №2 Almaty aýdandyq sotynda burynǵy QR Bilim jáne ǵylym vıtse-mınıstri Saıat Shahmetovke qatysty sot otyrysy ótip jatyr. S.Shaıahmetov Óskemende 700 oryndyq bilim berý mekemesi qurylysy kezinde qyzmet ókilettigin teris paıdalandy dep aıyptalyp otyr. Ol memleketke 1,1 mlrd. teńge kóleminde shyǵyn keltirdi delinedi.
Budan bólek, sotta aıyptalýshy retinde «Qazaqstan Respýblıkasy turǵyzylyp jatqan bilim jáne ǵylym nysandary dırektsııasy» JShS bas dırektory Aleksandr Pak, «Servıs JAK» JShS burynǵy bas dırektory Roman Kıreev jáne atalǵan JShS qazirgi dırektory A. Týtýbalın de qatysýda. Olarǵa bıýdjet qarjysyn alaıaqtyq jolmen jymqyrdy degen aıyp taǵylǵan.
