S.Seıfýllınniń týǵanyna 120 jyl tolýyna oraı «Sáken oqýlary» ótedi

ASTANA. QazAqparat - Bıyl Qazaqtyń mańdaıyna bitken birtýar azamat, aqyn, jazýshy, kórnekti memleket jáne qoǵam qaıratkeri Sáken Seıfýllınniń týǵanyna 120 jyl toldy. Sanaly ǵumyryn ultynyń qamyn jeýge arnaǵan dara tulǵanyń mereıtoıy qarsańynda birqatar ıgi sharalar qolǵa alynýda. Sonyń biri - oqýshylar arasynda ótetin dástúrli «Sáken oqýlary» baıqaýy.

Qalalyq deńgeıde ótkiziletin bul saıys 2014 jyly qazannyń 15 kúni Sáken Seıfýllın murajaıynda aqynnyń 120 jyldyq mereıtoıy qarsańynda qorytyndylanady.

Baıqaýdyń maqsaty - jas urpaqqa otansúıgishtik tárbıe berý, S.Seıfýllın shyǵarmashylyǵyn nasıhattaý, mektep oqýshylary arasynda kórkemsóz oqý sheberligin damytý jáne urpaqtar sabaqtastyǵyn nyǵaıtý

Astana qalasyndaǵy 7-11 synyp oqýshylary qatysatyn baıqaýda 4 túrli nomınatsııa sarapqa salynady. Atap aıtqanda, «Syr sandyqty ashyp qara» nomınatsııasy boıynsha aqynnyń poezııalyq shyǵarmasyn mánerlep jatqa oqý, «Tar jol, taıǵaq keshý» nomınatsııasy boıynsha prozalyq shyǵarmasynan úzindi oqý, «Arqanyń kerbez sulý Kókshetaýy» nomınatsııasy boıynsha Sáken ánderin oryndaý jáne «Sákenniń amanaty» atty Sáken ómirinen sahnalyq kórinis qoıý qamtylady.

Baıqaý jeńimpazdary úshin bir-birden birinshi, ekingshi, úshinshi oryndar jáne eki yntalandyrý syılyǵy taǵaıyndalǵan.

Ár mektepten eki oqýshydan ǵana qatystyrylady. Úmitkerler 10 qazanǵa deıin [e-mail] elektrondy poshtasyna ótinish hattaryn joldaýy tıis, dep habarlaıdy Ádebıet portaly.