S.Seıfýllınniń atyndaǵy QazATÝ aqynnyń dúnıege kelgenine 117 jyl tolýyna oraı merekelik jıyn ótkizdi
TANA. 17 qazan. QazAqparat /Gúlmıra Alıakparova/ - Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń aldyndaǵy alańda qazaqtyń kórnekti qalamgeri, memleket ári qoǵam qaıratkeri Sáken Seıfýllınniń dúnıege kelgenine 117 jyl tolýyna arnalǵan merekelik jıyn ótti.
Taý tulǵanyń esimin ıemdengen astanalyq tuńǵysh joǵary oqý ornynyń basshysy Aıtbaı Bulashev ýnıversıtettiń oqytýshylary men stýdentterine, qyzmetkerlerine, barsha qazaq eline osy dataǵa oraı izgi nıetin bildire otyryp, Sákenniń ómiri men ónerine qatysty maǵlumattarǵa toqtaldy.
«Sáken Seıfýllın Qazaq elin Keńester odaǵy quramyna engennen bastap búginge deıin basqarǵan 22 úkimet basshysynyń arasyndaǵy eń jasy, eń albyrt, ult jolynda jany qurban bolǵan isker basshy. S.Seıfýllınniń arqasynda kezinde qyrǵyz atanyp ketken halqymyzǵa «Qazaq» mártebesi qaıtaryldy. Ol úkimet qyzmetinde júrip, «Buryn qazaqqa bilim bir márte kerek bolsa, endi myń márte kerek», degen ustanymdy ustana otyryp, talaı sanaly qazaq jastarynyń Reseıdiń joǵary oqý oryndarynda bilim alýlaryna uıytqy boldy. Sol jolda Sákenniń sharapaty M.Áýezov, Á.Marǵulan, Q.Sátbaev syndy ǵulamalarǵa da tıgen-di. Ózgeniń oqýyna sebep qana bolmady, ózi de oqytty. Sol kezdegi elordasy Qyzylorda qalasyndaǵy alǵashqy qazaq joǵary mektepterinde bilim berdi. Qazaq aǵartý ınstıtýtynda rektorlyq qyzmetti de atqardy. Qoǵamdaǵy belsendiligin pýblıtsıstıkada qalam tartýymen de arttyrdy, qazaqtyń kommýnıstik jýrnalıstıka ınstıtýtynyń professory bolyp eńbek etti, «Eńbekshi Qazaq» gazetin uıymdastyrdy. Kezinde kommýnıstik saıasattyń el tarıhyna keltirgen zııany men zardabyn qazaq aqyn-jazýshylary arasynan tuńǵysh ret taısalmaı aıtqan da, shyǵarmasyna arqaý etken de osy Sáken bolatyn», - dep atap ótti rektor.
Qalyptasqan úrdis boıynsha, aqynnyń oqý orny aldynda ornalasqan eskertkishine ýnıversıtet ákimshiligi atynan A.Bulashev pen «Jas qalam» aqyn stýdentter shyǵarmashylyq birlestiginiń jetekshisi, 4 kýrs stýdenti Aqtilek Ibraımov gúl shoqtaryn qoıdy.
Jıyn barysynda stýdentter aqynǵa arnaýlaryn oqyp, onyń «Kerim aıdaı» ánin oryndady.
Kópshiliktiń agrotehnıkalyq oqý ordasyna nege ádebıet qaıratkeriniń esimi berilgen degen saýalǵa osy aıtylǵandarmen utymdy ári kelisti jaýap bergeni anyq.
Sáken - qazaq ádebıetiniń qaryshtap damýynda úlken ról atqarǵan jańashyl aqyn. Onyń poezııasy - Abaı men S . Toraıǵyrov shyǵarmashylyǵynyń zańdy jalǵasy bola tursa da, ıdeıalyq-shyǵarmashylyq prıntsıpi jaǵynan aıryqsha ereksheligi bar sony dúnıe. Sáken shyǵarmalarynyń ıdeıalyq nysanasy jańa dáýirdiń, keńestik zamannyń kókeıtesti máselelerimen tyǵyz ushtasyp jatady. Munyń ózi - sotsıalıstik realızm ádebıetiniń negizi, eń basty baǵyty, aıryqsha qadir-qasıeti. Qazaq dalasynda osy ádebıettiń týyn birinshi kótergen Sáken týyndylary - búgingi jańa ómirdiń jalyndy jarshysy bolǵan tarıhı máńgi qubylys. Qazaq jazýshylary ishinen tuńǵysh ret Eńbek Qyzyl Tý ordenimen nagradtalǵany óz aldyna bir tóbe mártebe.
