S.Seıfýllınniń arqasynda kezinde qyrǵyz atanyp ketken halqymyzǵa «Qazaq» mártebesi qaıtaryldy
ASTANA. 15 qazan. QazAqparat - Astanadaǵy S.Seıfýllın atyndaǵy Qazaq agrotehnıkalyq ýnıversıtetiniń aldyndaǵy alańda qazaqtyń kórnekti qalamgeri, memleket ári qoǵam qaıratkeri Sáken Seıfýllınniń dúnıege kelgenine 118 jyl tolýyna arnalǵan merekelik jıyn ótti.
Qalyptasqan úrdis boıynsha, aqynnyń oqý orny aldynda ornalasqan eskertkishine ýnıversıtet ákimshiligi atynan rektor Aqylbek Kúrishbaev gúl shoqtaryn qoıdy.
Sondaı-aq alyp Alash qaıratkeriniń esimin ıemdengen astanalyq tuńǵysh joǵary oqý ornynyń basshysy ýnıversıtettiń oqytýshylary men stýdentterine, qyzmetkerlerine, barsha qazaq eline osy dataǵa oraı izgi nıetin bildirdi.
«Sáken qoǵamdyq oı-pikir, ádebı, mádenı tarıhymyzda erekshe oryn alǵan jarqyn tulǵa. Sonaý 30-ynshy jyldary elimizde bolǵan saıası zulmatta talaı arystarymyz ben asyldarymyzdyń ǵumyry qyrshyn boldy. Biraq rýhy myqty adamdy tarıhtan óshirý múmkin emes. Sáken Seıfýllınniń rýhy máńgi jasaıdy. Elim, halqym dep ótken aıbyndy qaıratkerimiz qalamgerlik pen qaıratkerlikti tý etip, ot pen oqtyń arasynda júrip, jas urpaqqa amanat bolar baǵa jetpeıtin qundylyqtardy jazyp ketti», - deıdi A.Kúrishbaev.
Sáken Seıfýllın Qazaq elin Keńester odaǵy quramyna engennen bastap búginge deıin basqarǵan 22 úkimet basshysynyń arasyndaǵy eń jasy, eń albyrt, ult jolynda jany qurban bolǵan isker basshy. S.Seıfýllınniń arqasynda kezinde qyrǵyz atanyp ketken halqymyzǵa «Qazaq» mártebesi qaıtaryldy.
