S.Seıfýllın atyndaǵy QazATÝ stýdentteri Memleket basshysy Nursultan Nazarbaevqa úndeý joldady

«Qurmetti Nursultan Ábishuly! Biz, S.Seıfýllın atyndaǵy Qazaq agrotehıkalyq ýnıversıtetiniń stýdentteri, magıstranttary jáne doktoranttary Sizdiń «Qazaqstan bilim qoǵamy jolynda» atty dárisińizdi tyńdap, Sizge bizdiń elimizdiń bolashaǵyna jasaǵan qamqorlyǵyńyz úshin zor alǵysymyzdy bildiremiz. Sizdiń eńbek qoǵamy, bilim qoǵamy jolyna Qazaqstandy jeteleý úshin usynǵan ári jarııa etken ıdeıańyz aýmaly-tókpeli álem dáýirinde bilim alyp jatqan bizge, qazaqstandyqtardyń jas býynyna tikeleı baılanysty», - delingen úndeýde.

Ýnıversıtet stýdentteri ózderi bilim alyp jatqan ordanyń bolashaq mamandary retinde elimizdiń aýyl sharýashylyǵyn órkendetýge, shyǵarǵan ónimin álemdik standarttarǵa saı keltirýge bar kúsh-jigerlerin jumsaıtyndyǵyn basa aıtqan.

Sondaı-aq ýnıversıtet «Dıplommen - aýylǵa!» baǵdarlamasyna uıytqy bolǵandyǵyna nazar aýdartqan stýdentter, óz úndeýlerinde: «Búginde biz taǵy da Qazaqstannyń stýdent jastaryn aýyldy órkendetýge úndeımiz. Egerde biz bolmasaq kim órkendetedi. Aýyl sharýashylyǵynyń bolashaǵy bizde. Qurmetti Nursultan Ábishuly! Biz bolashaq aqparat, bilim men tehnologııa barynsha ónimdi paıdalanylatyn, ǵylym belsendi damıtyn elderge tıesi ekendigin bilemiz. Sondyqtan da biz Qazaqstannyń jas býynyn úzdik oqý, shet el tilderin jetik bilý jáne ýnıversıtettiń ǵylymı zertteýlerine belsendi qatysý arqyly elimizdiń údemeli ındýstrıalyq-ınnovatsııalyq damýy úshin «Bilim-Ǵylym-Innovatsııalar» úshtigin sátti júzege asyrýǵa bar kúsh-jigerin jumsaýǵa shaqyramyz», - deıdi.