S.Seıfýllın atyndaǵy QazATÝ-dyń professorlyq-oqytýshylyq quramy referendýmdy ótkizý bastamasyn qoldaıtyndyqtaryn bildirdi

«Astanadaǵy alǵashqy joǵary oqý orny - S.Seıfýllın atyndaǵy Qazaq agrotehnıkalyq ýnıversıtetiniń professorlyq-oqytýshylyq quramy Tuńǵysh Prezıdent - Elbasy N.Nazarbaevtyń ókilettigin 2020 jyldyń 6 jeltoqsanyna deıin uzartý úshin referendým ótkizý týraly bastamany qoldaıdy. Bizdiń ýnıversıtet kezindegi alpaýyt derjavanyń ydyraýy men táýelsiz Qazaqstan Respýblıkasynyń qalyptasý úrdisin memleketpen birge kórdi. Artqa kóz júgirtsek, táýelsizdigi jas azamattyń jasymen teń memlekettiń atqarǵan jumysy qyrýar ekendigin túsinesiń», - delingen taratylǵan habarlamada.

JOO-nyń professorlyq-oqytýshylyq quramy, Qazaq eliniń 20 jyl ishinde áleýmettik-ekonomıkalyq, halyqaralyq baılanystarda jetken jetistigi, KSRO-nyń kúni aıaqtalǵan kezde el tizginin óz qolyna alǵan Nursultan Nazarbaevtyń dana basshylyǵynyń arqasynda dep biledi.

«Osy jyldar boıy biz Elbasy N.Nazarbaevtyń kóregendi josparlary men ıdeıalaryn ómirge engizip kelemiz. Qazirgi ýaqytta biz ýnıversıtettiń jáne memlekettiń 2020 jylǵa deıingi Damý strategııasyn bir arnaǵa toǵystyra otyryp, bilim berý, údemeli ındýstrııalyq-ınnovatsııalyq damý baǵdarlamalaryn júzege asyrý úshin óz úlesterimizdi qosyp kelemiz. Biz úshin sondaı-aq, agrarlyq sektor el táýelsizdiginiń alǵashqy kúnderinen bastap Prezıdenttiń nazarynan tys qalmaǵany asa mańyzdy. Aýyl sharýashylyǵynyń mamandaryna eldiń azyq-túlik qaýipsizdigin qamtamasyz etý tapsyrmasy qoıyldy, biz muny tikeleı júktelgen mindet dep bilemiz jáne ol maqsatty oryndaý úshin barymyzdy salamyz», - delingen hatta.

Hattarynyń sońynda JOO ustazdary Qazaqstan Prezıdentinen óziniń mıllıondaǵan otandastarynyń úndeýin qapersiz qaldyrmaı, el gúldenýiniń kepili jáne Elbasy bolyp qala berýin surady.