S.Seıfýllın atyndaǵy QazATÝ bazasynda qazaqstandyq-qytaılyq zerthana qurylady
ASTANA. QazAqparat - S.Seıfýllın atyndaǵy Qazaq agrotehnıkalyq ýnıversıtetiniń bazasynda aýyl sharýashylyǵy ónimderin sertıfıkattaıtyn qazaqstandyq-qytaılyq zerthana qurylady. Bul jaıynda búgin atalǵan ýnıversıtettiń basshysy Aqylbek Kúrishbaev «Jibek jolynyń ǵylymı ınnovatsııasy jáne aýyl sharýashylyǵy bilimi alıansynyń» 2-shi otyrysy aıasynda BAQ ókilderine bergen suhbatynda aıtty, dep habarlaıdy QazAqparat.
Onyń sózine qaraǵanda, búginde alıans quramyna Eýropanyń TMD elderiniń, Qytaı, Arab elderiniń 60 joǵary oqý orny kiredi.
«Bul nelikten biz úshin mańyzdy bolyp otyr? Sebebi Jibek joly elderiniń tabıǵı-klımattyq jaǵdaıy óte uqsas. Memleket basshysy velosıped oılap tabýdyń qajeti joq, álemde bar dúnıelerdi alý kerek dep tapsyrma qoıǵan bolatyn. ıAǵnı jaslaǵan agrotehnıkalardy, ósimdik suryptaryn, janýarlardyń tuqymyn bizdiń jaǵdaıymyzǵa beıimdeý qajet. Muny jasaý endigi ýaqytta ońaı bolmaq. Búginde biz osy ispen aınalysyp jatyrmyz», - dedi ol.
Onyń sózine qaraǵanda, qazirgi ýaqytta elimizge túrli aýyl sharýashylyǵy daqyldarynyń 38 surypy ákelingen.
«Endigi ýaqytta qytaılyq áriptesterimizben birlesken veterınarlyq zerthana jasaýdamyz, agroınjınırıng ortalyǵyn qurdyq. Bul qytaılyq áriptesterimizdiń bizdiń ónimderdi baǵalaýy úshin jasalyp jatyr. Etimiz ben organıkalyq ónimderimizdi Qytaıǵa eksporttaýdaǵy basty problema - ónimimizge konservatıvti qarym-qatynastyń bolýy. Qytaıdyń kóptegen bıznesmeni bizdiń ónimderimizdi bilmeıdi. Týrasyn aıtsaq, onyń sapaly ekendigine senbeıdi. Sondyqtan Qazaqstanda qytaılyq ǵalymdarmen birlesip organıkalyq aýyl sharýashylyǵy, veterınarııa boıynsha birlesken zerthana qurýdy usynamyz. Olar bizdiń professorlarymyzben birge ónim sapasyn tekseretin bolady. Mine sol kezde qytaılyq bıznesmenderge ónimderimizdi usynyp, ol eksportqa jyldam shyǵarylady», - dedi Aqylbek Kúrishbaev.
Ýnıversıtet basshysynyń aıtýynsha, atalǵan zerthana osy aıdyń ishinde QHR Aýyl sharýashylyǵy mınıstrliginiń Qazaqstanǵa sapary aıasynda ashylady.
«Al organıkalyq aýyl sharýashylyǵy ónimderin sertıfıkattaý zerthanasyn kelesi jyldyń basynda ashýdy josparlap otyrmyz. Beıjińde Qytaıdyń Ǵylym jáne tehnologııa mınıstriniń jeke qabyldaýynda boldym. Ol bizdiń bastamamyzǵa qoldaý bildirip, Qytaıdyń qarjy bóletindigin aıtty. Biz zerthana uıymdastyramyz. Menińshe ol birneshe mıllıon dollardy quraıdy. Zerthana S.Seıfýllın atyndaǵy Qazaq agrotehnıkalyq ýnıversıteti bazasynda qurylady», - dedi Kúrishbaev.
