S.Seıfýllın atyndaǵy QazATÝ álemdik JOO-lar reıtıngisinde 6469-shy, otandyq JOO-lar arasynda 7-shi orynǵa kóterildi
TANA. 16 qyrkúıek. QazAqparat /Gúlmıra Alıakparova/ - Astanadaǵy S.Seıfýllın atyndaǵy Qazaq agrotehnıkalyq ýnıversıteti Webometrics ǵalamtor jelisinde jarııalanatyn álemdik JOO-lar reıtıngisinde 6 469-shy orynǵa, al otandyq ýnıversıtetter arasynda 7-shi orynǵa kóterildi. Bul týraly ýnıversıtet saıtynda habarlandy.
S.Seıfýllın atyndaǵy QazATÝ-dyń www.agun.kz saıty bul reıtıngte Qaraǵandy Memlekettik tehnıkalyq ýnıversıteti, Qazaq Ulttyq tehnıkalyq ýnıversıteti, Qazaq-Brıtan tehnıkalyq ýnıversıteti syndy Qazaqstandaǵy iri joǵary bilim ordalarynyń aldyn orap tur.
www.agun.kz saıty 2001 jyldan bastap álemdik ǵalamtor jelisine qosyldy. Sońǵy on jyl ishinde saıt únemi qarqyndy damý alyp, salmaqty dızaın, utymdy ári qolma-qol aqparat pen jyldam qyzmetiniń arqasynda jańashyldyqqa bet aldy. Saıt betterinen qajetti maǵlumattarǵa ǵalymdar men oqytýshylar da, stýdenter men talapkerler de ýaqytyly qol jetkize alady. Saıt aqparattary birneshe tilde taratylady: qazaq tilinde, latyn qarpinde, orys tilinde, aǵylshyn jáne qytaı tilderinde. Qazirgi tańda ýnıversıtet ákimshiligi saıt kontentiniń jıi jańartylýyna, mundaǵy ǵylymı ári akademııalyq maqalalardyń utymdy jarııalanýyna ekpindi nazar aýdarady.
«Ýnıversıtet saıtynyń qyzmeti Webometrics ǵalamtor jelisinde árdaıym oń baǵasyn taýyp, álemdik dárejede deńgeılenýi ujymǵa qýanyshpen qatar, jańa múmkindikter syılaıtyny sózsiz», delingen taratylǵan habarlamada.
Aıta keteıik, Webometrics-tiń álemdik JOO-lar reıtıngisine barlyǵy 12 myńnan astam oqý orny endi. Olardyń aldyn AQSh, Anglııa, Kanada jáne Eýropa elderiniń joǵary mektepteri bastap tur.
