«S.Seıfýllın atyndaǵy Qazaq agrotehnıkalyq ýnıversıtetiniń Ǵylymı jarshysy» jýrnaly «Parasat» táýelsiz syılyǵynyń dıplomyna ıe boldy

Ótken aptada Almaty qalasynda otandyq ǵylymdy damytýǵa aıtýly úles qosqan ǵalymdardy «Parasat» táýelsiz syılyǵymen marapattaý saltanaty ótti. Syılyq «Ulttyq ǵylymı-tehnıkalyq aqparat ortalyǵy» AQ-nyń bastamasymen ótken jyldan bastap berile bastady. Byltyr júldeler maqalalary sheteldik basylymdarda eń kóp jaryq kórgen ǵalymdarǵa ǵana berilse, bıyl bul syılyqqa qazaqstandyq ǵylymı jýrnaldar da ıe boldy.

«AÓK jáne taǵam ónerkásibi salasyndaǵy joǵary ımpakt-faktorly Qazaqstannyń jetekshi ǵylymı jýrnaldary» atalymynda «Parasat» táýelsiz syılyǵynyń dıplomyna «S.Seıfýllın atyndaǵy Qazaq agrotehnıkalyq ýnıversıtetiniń Ǵylymı jarshysy» jýrnaly ıe boldy.

Aıta keteıik, ýnıversıtettiń atalmysh ǵylymı jýrnaly 1994 jyldan basta qazaq, orys jáne aǵylshyn tilderinde shyǵarylyp keledi. Onda professorlyq-oqytýshylyq quramnyń jáne aspıranttardyń ǵylymı-praktıkalyq konferentsııalarynda baıandalǵan agrarlyq ǵylym problemalaryna qatysty jańa zertteýlerdiń nátıjesi jarııalanady. Jýrnal toqsan saıyn jaryq kóredi. Onyń redaktsııalyq keńesiniń tóraǵasy veterınarııa ǵylymdarynyń doktory, professor Aıtbaı Bulashev.