S.Seıfýllın atyndaǵy Qazaq agrotehnıkalyq ýnıversıteti álemdik JOO-lar reıtınginde 3105 orynǵa joǵarylady
ASTANA. 11 aqpan. QazAqparat /Gúlmıra Álıakparova/ - Astanadaǵy S.Seıfýllın atyndaǵy Qazaq agrotehnıkalyq ýnıversıteti ótken 2010 jyly ǵylym-bilim berý qyzmetinde úlken serpilis jasap,
www.webometrics.info saıtynda jarııalanatyn álemdik JOO-lar reıtınginde 3105 orynǵa joǵarylady.
Webometrics saıtynyń álem boıynsha paıdalanýshylarynyń sany óte úlken. Saıt jyl saıyn 20 000-nan astam JOO-larǵa taldaý jasap, onyń 12 myńyn reıtıngige engizedi.
50 jyldan astam tarıhy bar elordadaǵy Qazaq agrotehnıkalyq ýnıversıteti 2009 jyly osy reıtıngtiń 10510-ornynan kóringen bolsa, ótken jyldyń nátıjesi boıynsha Qazaq Ulttyq medıtsına ýnıversıtetin (9517), Halyqaralyq ІT-ýnıversıteti (11087) men Qazaq ulttyq agrarlyq ýnıversıtetti (11406) artta qaldyryp, 7405-orynǵa ornalasty. Álemdik ǵalamtordyń reıtıngine qazaqstandyq barlyǵy 27 JOO endi.
Atalmysh saıttyń maqsaty ǵylymı eńbekter men akademııalyq materıaldardyń elektrondy nusqalarynyń qoljetimdi bolýyna qoldaý kórsetý bolyp tabylady. JOO-lardyń reıtıngi ınternet betterinde jaryq kórgen basylymdardyń sany men sapasyna baılanysty anyqtaldy.
