S.Sápıev álem chempıonatyndaǵy alǵashqy jekpe-jegin aıqyn basymdyqpen aıaqtady
ASTANA. 30 qyrkúıek. QazAqparat - Bokstan elimizdiń ulttyq quramasynyń kapıtany Serik Sapıev álem chempıonatyndaǵy alǵashqy jekpe-jegin merziminen buryn jeńispen aıaqtady.
Keshe ol Bakýde ótip jatqan baıraqty básekede ekvadorlyq boksshymen kezdesken bolatyn.
Shıelenisti ótken birinshi raýndtyń sońyna taman S.Sápıevtiń aýyr soqqysyna ushyraǵan ekvadorlyq Karlos Sanchezdi sátti soǵylǵan gong úni qutqaryp qaldy. Esep 6:2 bolyp qazaq boksshysynyń paıdasyna sheshildi. Al ekinshi raýndta erkin ári senimdi judyryqtasqan Serik qarsylasynyń soqqylarynan sytyla júrip, esepti 12:3-ke jetkizdi.
Úshinshi kezeńde qatty sasqan ekvadorlyq qazaq boksshysyn qoıan-qoltyq urysqa tartpaq bolyp edi. Degenmen bul tásili esh nátıje bermedi. Osy raýndtyń orta tusynda qazaqstandyqtyń aýyr soqqysyn alyp eseńgiregen qarsylastyń jaı-kúıin baǵamdaǵan tóreshi jeke-jekti toqtatýǵa májbúr boldy.
Endi S.Sapıev qazannyń 2-si kúni bolgarlyq Naıden Stoıanovty 20:11 esebimen utqan taılandyq Apıchet Saensıtpen kezdesedi.
Al búgin keshke 64 keli salmaq sanatynda judyryqtasatyn Danııar Eleýsinov sharshy alańǵa shyǵady. Onyń qarsylasy - shotlandyq Djosh Teılor.
