S&P Qazaqstannyń nesıe reıtıngin jaqsartty
ASTANA. QazAqparat - S&P reıtıng agenttiginiń baspasóz habarlamasyna səıkes, Qazaqstannyń reıtıngi «BBB-/A-3» deńgeıine deıin kóterilip, «keri boljamnan» «turaqty» dárejesine jaqsardy, dep habarlaıdy QR Ulttyq ekonomıka mınıstrligi.
Boljamdy oń baǵytqa qaraı qaıta qaraýǵa birqatar faktorlar əser etti. Onyń ishinde aqshalaı-nesıe saıasaty tıimdiliginiń artýy erekshe atap ótiledi. Rezıdentterdiń dollardaǵy depozıtteriniń úlesi 2015 jyldyń sońynda 70 paıyz bolǵan bolsa, 2017 jylǵy shildede 48 paıyzǵa deıin kúrt tómendegen. «2016 jyldan bastap ekonomıkaǵa, onyń ishinde negizinen munaıgaz salasyna tikeleı sheteldik ınvestıtsııalardyń turaqty kelýin esepke alsaq, S&P budan soń syrtqy mindettemelerdi qarjynyń jylystaýy retinde qarastyrmaıdy», delingen mınıstrliktiń habarlamasynda.
Budan basqa, Qazaqstan «tómen deńgeıindegi taza nesıeger» pozıtsııasyn saqtap qaldy. S&P baǵalaýy boıynsha, bul kórsetkish 2017 jyly 17 paıyz shamasynda bolyp, bolashaqta qosymsha qaryz alýdyń joǵary qabilettiligin qamtamasyz etýge múmkindik beredi. Bul jerde lıkvıdtik aktıvterdiń, onyń ishinde negizinen Ulttyq qor aktıvteriniń 2017 jyldyń sońynda JІÓ kóleminiń 40%-n quraıdy dep boljanyp otyrǵanyn eskere ketý kerek. S&P derekteri boıynsha, jańa salyq kodeksi de bıýdjetke túsimderdiń ulǵaıýyna múmkindik bermek.
Qazaqstannyń reıtıngine Úkimettiń kúshti fıskaldyq pozıtsııasy da áser etti. Bul jaǵdaı shıkizattyq taýarlarǵa joǵary baǵa kezeńinde jınaqtalǵan qordyń (ásirese, Ulttyq qordyń) arqasynda múmkin bolyp otyr. Sondaı-aq agenttik ekonomıkanyń naqty sektoryndaǵy ekonomıkalyq ósimdi de atap ótken.
S&P baǵalaýy boıynsha, naqty ekonomıkalyq ósim 2017-2020 jyldary orta eseppen 3%-ǵa jetedi. Buǵan Úkimettiń ınfraqurylymdyq baǵdarlamalaryn júzege asyrýy jəne Qashaǵan ken ornynda munaı óndirýdiń artýy áser etedi. Sarapshylar sonymen birge ekonomıkalyq ósimge memlekettik ınvestıtsııalar, eksporttyń ulǵaıýy jəne munaı óndirýdiń artýy oń yqpal etedi degen senimde.
«2011-2020 jyldary halyqtyń JІÓ jan basyna shaqqandaǵy ósimi 1,4% shamasynda bolatyny da atap ótilgen. Joǵaryda keltirilgenderdiń barlyǵy 2017 jyldyń basynan beri baıqalyp otyrǵan makroekonomıkalyq belsendiliktiń jaqsarýynyń nətıjesi», delingen habarlamada.
Aıta keteıik, Qazaqstan úshin oń nesıe reıtıngi shetelden kóptep qarajat tartýǵa múmkindik beredi, ıaǵnı bizdiń nesıe reıtıngimiz joǵary bolǵan saıyn syrtqy naryqtaǵy qaryz alý sharty da jaqsarady. Oń nesıe reıtıngi Qazaqstanǵa tikeleı sheteldik ınvestıtsııalardyń kelýine de yqpal etpek.
Esterińizge sala keteıik, buǵan deıin Moody's reıtıng agenttigi de Qazaqstannyń boljamyn «teristen» «turaqtyǵa» jaqsartyp, Qazaqstannyń təýelsiz reıtıngin "Baa3" deńgeıinde bekitken bolatyn.
