«S. Ótebaev atyndaǵy stıpendııa men grant» berý bilim jobasynyń ekinshi kezeńi aıaqtaldy
ASTANA. 13 shilde. QazAqparat /Qanat Mámetqazyuly/ - «QazMunaıGaz» ulttyq kompanııasy jáne KAZENERGY qaýymdastyǵy 2010-2011 oqý jyly boıynsha «Safı Ótebaev atyndaǵy stıpendııa men grant» berý bilim jobasynyń ekinshi kezeńi aıaqtalǵany týraly habarlaıdy.
«2010-2011 oqý jylyndaǵy baıqaýǵa 7 kásibı lıtseı men kolledjden 17 oqytýshy jáne 5 beıindi joǵary oqý ornynan 67 stýdent qatysty. Soǵan oraı, quramynda «KazEnergy» qaýymdastyǵynyń, «QazMunaıGaz» Barlaý, Óndirý» AQ, «Intergaz Ortalyq Azııa» AQ, «QazRosGaz» JShS, «Teńizshevroıl» JShS, Agip Karachaganak B.V. jáne basqa da munaı-gaz kompanııalarynyń ókilderi bar arnaıy jumys toby 20 jeńimpazdy tańdap aldy. Olardyń arasynda beıindi oqý oryndarynyń 5 oqytýshysy jáne beıindi joǵary oqý oryndary stýdentteri bar. Atap aıtqanda, stýdentterdiń arasynda: Erık Atashev, Indıra Shuǵaıypova, Jadyra Kóbeseıitova, Qanat Ońǵarbaev, Ásel Jákenova, Ásel Moldasheva, Áıgerim Buqarbaeva, Oljas Asanbaev, Elmıra Qajyǵalıeva, Ádil Tólebaı, Aslan Kókbaev , Felıks Iodkovskıı, Ertaı Áýbákirov, Marat Ibaǵarov jáne Shyńǵys Bóribek jeńimpaz atandy. «S.Ótebaev atyndaǵy bilim baǵdarlamasynyń stıpendıaty ataný úlken qurmet. S.Ótebaev - Qazaqstan munaı ónerkásibiniń negizin qalaýshylardyń biri, elimizdegi kóptegen munaı ken oryndaryn ashqan maman. Sonymen birge bul joba oqýǵa degen yntamyzdy odan ári arttyrady», - dedi Atyraý munaı-gaz ınstıtýtynyń stýdenti Qanat Ońǵarbaev.
Muǵalimder eńbegin baǵalaý kezinde jumys toby ǵylymı jarııalanymdar, oqýlyqtardyń, ádistemelik nusqaýlar men oqý quraldarynyń zertteýlerine qatysýy (ózi nemese birlesken avtorlyq), oqý úderisinde ınnovatsııalyq oqytý tehnologııalaryn qoldaný máselelerin eskerdi. Sonymen qatar oqýshylardyń ǵylymı-zerttemelik jáne shyǵarmashylyq jumystarynyń jetekshiligine mán berdi. Stýdentterdi tańdaý barysyndaǵy basty talaptar GPA-diń 3,5-ten kem emes, kásipqoı birlestikterde múshelik, memlekettik jáne halyqaralyq ǵylymı sharalarǵa qatysýy men jarııalanymdaryna nazar aýdaryldy.
QazAqparat anyqtamasy: Safı Ótebaev 1909 jyly Atyraý oblysynyń Qarabaý aýylynda dúnıege kelgen. Eńbek jolyn 1925 jyly Dossorda dánekershiniń kómekshisi retinde bastaǵan. 1935 jyly Ázirbaıjandaǵy M.Azızbekov atyndaǵy munaı ınstıtýtyn bitirip, alǵashqy qazaq munaıshy-ınjeneri boldy. S.Ótebaev 40 jyldan asa Qazaqstannyń munaıly óndirisinde jumys istegen, qatardaǵy ınjenerden «Qazaqstan munaı» birlestiginiń bastyǵy, Atyraý jáne Batys Qazaqstan halyq sharýashylyǵy keńesiniń tóraǵasy qyzmetine deıin kóterildi. 1938 jyly S.Ótebaevtyń bastamasymen Atyraý qalasynda respýblıkadaǵy alǵashqy munaı óńdeý zaýytyn ashý týraly sheshim qabyldandy.
S.Ótebaev jas urpaqtyń sapaly bilim alýyna basa nazar aýdardy, jastardyń joǵary oqý oryndaryna túsýine múmkindik jasady, munaı tehnıkýmdarynyń tehnıkalyq jaǵynan jabdyqtalýyna kómektesti. QazPTI-de munaı fakýltetiniń ashylýy da belgili munaıshynyń esimimen baılanysty, ol osy ınstıtýttyń oqytýshylarymen jáne stýdentterimen tyǵyz baılanysta boldy. Sonymen qatar ol Odaqtyń aldyńǵy qatarly munaı ınstıtýttaryna 20 jyl boıy Qazaqstan orta mektepteri túlekteriniń túsýine Úkimettiń arnaıy sheshim qabyldaýyna yqpal etti.
