S. Nokın baspanaǵa qatysty jas otbasylar tizimin ákimdikte qurylǵan jastar saıasaty basqarmasyna berýdi usyndy
ASTANA. 7 jeltoqsan. QazAqparat - Ákimdikterde qurylǵan jastar saıasaty basqarmasyna, jas otbasylarynyń tizimin belgileýdi júkteý kerek.
Ol tizim jastar qoǵamdyq uıymdarynyń qatysýymen jasalsa ıgi. Parlamentte «Halyqty turǵyn úımen qamtamasyz etýdiń jaı-kúıi men perspektıvalary» atty taqyrypta ótken parlamenttik tyńdaýda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osyndaı usynys aıtty.
Tóraǵanyń aıtýynsha, búgingi baǵdarlamaǵa sáıkes jalǵa beriletin páterlerdi berý úshin jas otbasylardyń tizimin qalyptastyrýdy jergilikti atqarýshy organdar júrgizedi. Budan keıin «Turǵyn-úı-Qurylys-Jınaq-Banki» úmitkerlerdiń tólem qabiletin baǵalaıdy.
«Alaıda keıbir ákimdikter úmitkerlerden qujattar qabyldaıtyn jáne olardyń tizimin jasaıtyn qurylymdyq bólimsheni áli belgilegen joq. Bul jas otbasylar tarapynan ótinishti «kimge?» «qaıda?» jazý kerek degen suraqtardy týǵyzyp otyrǵany da ras. Sondyqtan da, ákimdikterde qurylǵan jastar saıasaty basqarmasyna jas otbasylarynyń tizimin belgileýdi usynamyz. Onyń jumysy jastar qoǵamdyq uıymdarynyń qatysýymen birlese atqarylsa ıgi», - dedi Serik Nokın.
