S.Musaıbekov mońǵol dzıýdoshysynyń nelikten Qazaqstan atynan synǵa túsetindigin túsindirdi

ASTANA. QazAqparat - Qazaqstan dzıýdodan álem chempıonatyn ótkizýge tolyq daıyn. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte Mádenıet jáne sport vıtse-mınıstri Sáken Musaıbekov málim etti.

«Búgin Astanada dzıýdodan álem chempıonaty bastaldy. 24-30 tamyz aralyǵynda «Alaý» sport saraıynda jańa álem chempıondarynyń esimder anyqtalmaq. Elimizge osy jarysqa qatysý úshin 900-ge jýyq sportshy, 144 eldiń ókili, 200-den astam shetel jýrnalısteri jáne halyqaralyq uıymdardyń ókilderi kelip jatyr. Búgin saǵat 16-00-de chempıonattyń resmı ashylýy bolady. Qazaqstan bul chempıonaty qarsy alýǵa daıyn», - dedi ol.

Sonymen qatar ol BAQ ókilderine mońǵoldyq dzıýdoshynyń Qazaqstan atynan óner kórsetýine qatysty da túsinik berdi.

«Mońǵol dzıýdoshysy Otgontsetseg Galbadrahpen kelissózder ótken jyly olardyń bastamasymen bastalǵan bolatyn. Bul qyz álemniń úzdik dzıýdoshylarynyń bestigine kiredi. Ol óz erkimen Qazaqstan atynan óner kórsetkisi, Qazaqstan quramasynyń sapynda olımpıadalyq jetistikterge jetkisi keldi. ıAǵnı, óziniń sportshy retindegi talantyn bizdiń elimizde kórsetýge nıet tanytyp otyr», - dedi vıtse-mınıstr.