S.Máýlenov esimi alystan munartqan asqar taýlardaı jaqyndaǵan saıyn bıikteı beretin, jyl ozǵan saıyn jańǵyryp, jaqyndaı túsetin qasterli esim

ALMATY. 4 aqpan. QazAqparat - Qostanaı óńiri daryndy qalamgerlerge baı desek te Syrbaı Máýlenov kózi tirisinde eli qadir tutqan talantty birtýar jyrdyń tulpary, syrdyń suńqary edi. Bul týraly búgin Almatydaǵy Ádebıetshiler úıinde Qazaqstannyń halyq jazýshysy, Memlekettik syılyqtyń laýreaty, aqyn Syrbaı Máýlenovtiń týǵanyna 90 jyl tolýyna arnalǵan saltanatty jıynǵa qatysýshylarǵa Qostanaı oblysynyń ákimi Nuraly Sádýaqasovtyń joldaǵan quttyqtaýynda aıtyldy.

"Qostanaılyqtar da aqynnyń atyn ulyqtap 2012 jyly 15 qazan kúni Qostanaı qalasynda aımaqtyq konferentsııa ótkizdi. Qostanaı oblysy ákimdiginiń mádenıet basqarmasynyń uıymdastyrýymen ótken bul sharaǵa Syrbaı Máýlenovtiń otbasy músheleri, qazaqstandyq tanymal jazýshylar men aqyndar, kórnekti qoǵam qaıratkerleri, ǵalymdar men shyǵarmashylyqpen aınalysatyn Qostanaı jurtshylyǵy qatysty", - deıdi N.Sádýaqasov. Onyń aıtýynsha, S.Máýlenov atyndaǵy gımnazııada murajaı oıdaǵydaı qyzmet isteýde jáne qalanyń bir kóshesi aqynnyń esimimen atalǵan. Sonymen qatar Jangeldın aýdanyndaǵy Mılysaı kentindegi orta mektep aqynnyń esimin máńgi dáripteýge atsalysýda.