S. Mataevtyń qorǵaýshysy bultartpaý sharasyn kepilge bosatýǵa ózgertýdi surady
ASTANA. QazAqparat - C. Mataev pen Á. Mataevtyń qorǵaýshysy sotta bultartpaý sharalaryn kepilge bosatýǵa aýystyrýdy surady.
«Jasyn, otbasylyq jaǵdaıyn, onyń budan buryn qylmystyq jaýapkershilikke tartylmaǵanyn eskere otyryp, sondaı-aq tergeýden jasyrynýǵa eshbir áreket jasamaǵanyn nemese tergeýge kedergi keltirmegenin nazarǵa ala otyryp, Seıitqazy Mataevqa qatysty úıqamaq túrindegi bultartpaý sharasyn ózgertip, kepilge jiberý bultarpaý sharasyn taǵaıyndaýdy sottan suraımyn», - dedi qorǵaýshy Andreı Petrov.
Onyń sózine qaraǵanda, S. Mataevtyń týystary kepil retinde 500 AEK-ti sottar ákimshisine aýdarǵan, sonymen qatar 500 AEK Áset Mataev úshin de kepil retinde engizildi. Bul turǵyda qorǵaýshy Á. Mataevqa qatysty bultarpaý sharasyn úıqamaqtan kepilge bosatýǵa aýystyrýdy surap otyr.
Esteńizge sala keteıik, Qazaqstan Jýrnalıster odaǵynyń tóraǵasy Seıitqazy Mataev 2016 jylǵy 22 aqpanda Almaty qalasy boıynsha sybaılas jemqorlyqqa qarsy is-qımyl ulttyq bıýro qyzmetkerlerimen ustalǵan bolatyn. Oǵan qatysty salyq tóleýden jaltarý men bıýdjet qarjysyn jymqyrý aıyptary taǵylyp otyr.
Aıta keteıik, S. Mataeav pen Á. Mataev múddesin sot otyrysynda úsh qorǵaýshy, ıaǵnı Andreı Petrov, Serikqalı Mýsın jáne Mádına Bakıeva qorǵaýda. Sotta sýdıa Aqbolat Qurmantaev tóraǵalyq etýde.
