S.Lýkıanenko «Baıqońyr» halyqaralyq ádebı baıqaýynyń qazylar alqasynyń quramyna kirdi

«Nochnoı Dozor», «Dnevnoı Dozor», «Sýmerechnyı Dozor» kitaptary men Tımýr Bekmambetov túsirgen attas fılmderdiń stsenarııleriniń avtory qosyldy. Bul týraly «Bolashaq» prezıdenttik stıpendıattar qaýymdastyǵynyń baspasóz qyzmetinen habarlady.

Sergeı Lýkıanenko Qazaqstannyń ońtústigindegi Qarataý qalasynda dúnıege kelip, Almaty memlekettik medıtsına ınstıtýtyn dáriger-psıhıatr mamandyǵy boıynsha bitirgen. Ótken ǵasyrdyń 80-shi jyldarynyń sońynda Almaty qalasynyń «Alfa-Pegas» fantastıka klýbynyń negizin qalaǵan. Qazirgi ýaqytta Máskeý qalasynda turady jáne qyzmet etedi.

Jazýshy «Nochnoı dozor», «Dnevnoı dozor», «Sýmerechnyı dozor», «Poslednıı dozor» jáne taǵy da basqa kitaptarymen áıgili. «Aelıta», «Zvezdnyı most», Platındi Tarlan, Aleksandr Grın atyndaǵy premııalardyń ıegeri. «Strannık» syılyǵynyń túrli nomınatsııalarynyń birneshe márte ıegeri.

Baıqaý jeńimpazdaryn Sergeı Lýkıanenkodan basqa qazaqstandyq fantastıkanyń negizin qalaýshylary Abdýl-Hamıd Marhabaev pen Medeý Sársekeev, jazýshy, aqyn, ǵalym Orynbaı Janaıdarov, qazaq ádebıetindegi alǵashqy áıel fantast Narbın Kenjeǵulova jáne qazaqstandyq fantastıkanyń basqa da bilgirleri anyqtaıdy.

Qazaqstan Respýblıkasynyń Táýelsizdiginiń 20-jyldyǵy atap ótiletin jyly «Bolashaq» qaýymdastyǵy men qazaqstandyq fantastıka áýesqoılary álemdik ǵylymı fantastıka ilimi men ǵaryshty ıgerý isiniń damýyna qosqan úlesi úshin beriletin «Baıqońyr» qoǵamdyq syılyǵyn jarııalaǵanyn eske salǵan jón.

«Baıqońyr» halyqaralyq jastar fantastıkalyq áńgimeler baıqaýy Halyqaralyq ǵaryshkerler kúni, ıaǵnı 12 sáýirde bastalyp, 18 jáne 35 jas aralyǵyndaǵy barlyq azamattarǵa ózderin fantastıka men fentezı janrlarynda synap kórýge múmkinshilik berdi. Demeýshilerdiń arqasynda baıqaý jeńimpazdary óz týyndylaryn ádebı jýrnaldarda, kitap jınaqtarynda jarııalaý múmkinshiligine jáne baǵaly syılyqtarǵa ıe bolady.